L-aħbar li d-donazzjoni ta’ nofs miljun ewro mill-kumpanija Catco lid-Dar tal-Providenza, li mar jippreżenta l-eks Kap Nazzjonalista Adrian Delia ġiet rifjutata, qed tintuża mill-fazzjoni ta’ Simon Busuttil u l-establishment li jinsab wara Bernard Grech biex ikompli jiġi attakkat Adrian Delia.
Wara l-istqarrija li ħarġet id-Dar tal-Providenza, Adrian Delia fuq il-midja soċjali qal li hemm min ipprova jħammġu u jżebilħu.
Lil dawk li qed jattakkawh fuq il-preżentazzjoni tad-donazzjoni, Delia wieġeb li min irid biss jagħmel ħsara hu se jibqa’ jaħdem.
Qal li hu ma ħax flus jew għamel xi ħaġa għall-gwadann personali.
Delia saħaq li wara l-istqarrija tad-Dar tal-Providenza, li kienet qed tagħmel il-verifiki tagħha, talab risposta dwar dan mingħand il-grupp tal-Catco.
Intant id-deputat Nazzjonalista Jason Azzopardi, li anki qiegħed il-Qorti ma’ Delia dwar allegazzjonijiet, ippubblika fuq il-profil tiegħu fuq facebook l-istorja li d-Dar tal-Providenza rrifjutat is-somma li preżenta Delia.
Għal dan, persuna kitbitlu u qaltlu, “Donnok għamilt xi rebħa Jason”.
Azzopardi wieġbu u qallu li d-Dar tal-Providenza ġiet ingannata.
Apparti hekk, l-esponent tal-establishment u l-eks Chief of Staff ta’ Austin Gatt, Manuel Delia, kompla jattakka lil Delia fuq din id-donazzjoni billi qal li bħal kull ħaġa oħra wegħda ta’ Adrian Delia ma mmaterjalizzatx.
Manuel Delia qal li m’għandniex nieħduha bi kbira li ċekk li ppreżenta Adrian Delia lid-Dar tal-Providenza ma mmaterjalizzax.
Fl-artiklu Manuel Delia jinsulenta lil Adrian Delia u dawk li jappoġġjawh fil-partit, fl-isfond anki ta’ kandidati Nazzjonalisti li rtiraw mill-elezzjonijiet tal-kumitati.
Manuel Delia jġib eżempju ta’ birrerija li tkun f’idejn Adrian Delia u jgħid li hawnhekk ħadd ma jsib il-birra għaliex Adrian Delia jkun xorobha kollha qabel jaslu n-nies biex jixorbu.
Manuel Delia jżid jikteb li Adrian Delia ħalla l-finanzi tal-Partit Nazzjonalista qoxqox u jirreferi għall-allegazzjonijiet li l-eks Kap u Pierre Portelli ħadu eluf ta’ ewro mingħand Yorgen Fenech.
Hawnhekk Manuel Delia jsemmi li t-tmexxija ta’ Simon Busuttil ippruvat tirranġa s-sitwazzjoni finanzjarja u faħħar deputati bħal Jason Azzopardi, Karol Aquilina u David Casa, tlieta minn dawk li sfiduċjaw lil Delia.
Manuel Delia qal li meta n-nies raw lil Adrian Delia jippreżenta s-somma ta’ nofs miljun ewro lid-Dar tal-Providenza, ħadd ma ħaseb li kienet ħadma u ħadd ma qabżitlu xi demgħa b’simpatija lejn Adrian Delia, li sejjaħlu buffu.
F’dan il-kuntest, Manuel Delia talab lil Adrian Delia biex jisparixxi u fl-aħħar qallu għalfejn għadek hawn.
