Raġel ta’ 53 sena ġie arrest mill-Pulizija tal-Iskwadra ta’ Kontra d-Droga, b’rabta ma’ pussess ta’ droga kokaina u eroina.
Dan ara rejds li twettqu, il-Ħadd li għadda fiż-Żejtun.
Minn tfittxija li saret fuqu nstabu tliet pakketti b’sustanza suspettata kokaina.
Aktar tard fir-residenza tiegħu, li tinsab fi Triq Siniskal instabu ħdax-il pakkett ieħor li kienu moħbija fl-iskalora u fihom kien hemm aktar sustanza suspettata kokaina, permezz tal-għajnuna ta’ kelb tat-Taqsima tal-Klieb (K9).
Intant f’operazzjoni oħra li twettqet ilbieraħ ġew arrestati erbat irġiel oħra b’rabta ma’ pussess ta’ droga.
Dan wara li minn tfittxija li saret f’dar li tinsab fi Triq Joe Attard, instabu diversi qratas ta’ droga b’sustanza suspettata kokaina u eroina, lesti għat-traffikar, kif ukoll diversi oġġetti relatati mat-traffikar tad-droga u ammont ta’ flus kontanti.
Ritratti: Uffiċċju tal-Komunikazzjoni, Il-Korp tal-Pulizija ta’ Malta.
