Il-pulizija qalet li lbieraħ arrestat raġel ta’ 46 sena fl-inħawi taċ-Ċirkewwa wara fil-karozza tiegħu nstabu tliet kilogrammi ta’ ħaxixa tal-kannabis.
Il-pulizija qalet li kienet ilha xi jiem tosserva lir-raġel mill-Marsa u lbieraħ għal ħabta tal-ħdax ta’ filgħodu waqqfet il-karozza li kien qed isuq ir-raġel.
Minn tfittxija li saret, fuq wara tal-karozza nstabet id-droga fi xkora.
Il-pulizija sabet tnax-il pakkett bil-kannabis, li l-valur fit-triq tad-droga li nstabet tlaħħaq l-€55,000.
Ir-raġel qiegħed jinżamm arrestat id-depot filwaqt li l-Maġistrat tal-Għassa Dr Claire Stafrace Zammit ġiet infurmata bil-każ u ħatret inkjesta.
