Ftit wara nofsinhar seħħet ħabta fi Triq Sant’Andrija, is-Swieqi. Mutur tat-tip BMW ħabat ma’ Peugeot waqt li ż-żewġ vetturi kienu qed jinstaqu fl-istess direzzjoni, lejn San Ġiljan.
Ambulanza ħadet lis-sewwieq tal-mutur – Ġermaniz ta’ 59 sena residenti Ħal Balzan, l-Isptar Mater Dei għall-kura. Huwa qiegħed isofri minn ġrieħi gravi iżda mhux fil-periklu tal-mewt.
Il-karozza kienet qiegħda tinstaq minn żagħżugħ ta’ 20 sena residenti Ħal Għargħur li ma sofra l-ebda ġrieħi.
Inċident separat seħħ għall-ħabta tas-siegħa u kwart ta’ waranofsinhar, fi Triq l-Avjazzjoni, il-Gudja.
Mutur tat-tip Hyosung baqa’ dieħel ġo xi ġebel li waqgħu minn fuq trakk misjuq minn raġel ta’ 57 sena residenti Birżebbuġa.
Ambulanza ħadet lis-sewwieq tal-mutur, ġuvni ta’ 23 sena residenti Ħ’Attard, l-Isptar Mater Dei sabiex jingħata l-kura meħtieġa. Huwa ġie kkonfermat li ma jinsabx fil-periklu tal-mewt.
