L-Orkesta Filarmonika Nazzjonali reġgħet ma ddiżapuntatx. L-edizzjoni 2016 ta’ Rockestra kienet waħda li tat pjaċir lill-eluf li attendew u segwew uħud mill-aqwa kantanti f’pajjiżna joffru wirja ta’ mużika popolari b’laqta rock.
Sa mis-sitta tas-Sibt wara nofsinhar il-folla bdiet tinġabar fl-MFCC Ta’ Qali biex mal-ħin ir-ritmu mużikali beda jżied sakemm il-qofol intlaħaq bil-wirja mal-orkestra wara li ndaqq l-innu Malti.
Minn hemm indaqqu kanzunetta wara oħra b’iktar ma jgħaddi l-ħin il-folla bdiet twieġeb għal diski li hi l-iktar familjari magħhom.
Organizzat b’mod eċċellenti bħas-soltu u b’iktar miżuri ta’ sigurtà l-kunċert reġa’ ħalla togħma tajba fost nies ta’ kull età filwaqt li bil-biljett tad-dħul kienet mgħejjuna l-Malta Community Chest Fund.
