Il-Malti jgħid erfa’ u sorr għal meta tiġi bżonn.
F’dan l-ispirtu l-Gvern permezz tal-Ministeru għall-Familja ffirma ftehim ta’ tliet snin mal-Bank of Valletta u l-Mapfre MSV Life li se jara kampanja sabiex iżjed nies iġemmgħu bħala parti mill-istrateġija ‘Ġemma’.
Dan sabiex wieħed ikollu somma taħt rasu għal meta jasal biex jirtira sabiex jibqa’ jżomm livell ta’ għajxien ogħla.
Kenneth Farrugia, Uffiċjal Kap tal-iżvilupp tan-negozju tal-Bank of Valletta, spjega li din il-kampanja għandha l-għan li fost oħrajn tispjega kif wieħed għandu jfaddal aktar mid-depożiti li jitħallew fil-bank wara li tidħol il-paga.
Huwa spjega: “Id-dħul li ddaħħal minn depożitu normali mhux se jkun suffiċjenti biex meta tirtira jkollok dik is-somma biex iżżomm l-istandard of living. Illum hemm diversi soluzzjonijiet ta’ investiment. Hemm benefiċċju ta’ taxxa għal min jikkontribwixxi għal skemi ta’ pensjoni.”
Iċ-ċittadin se jkun mgħarraf bl-għarfien li jippermettilhom li jieħdu l-aħjar deċiżjonijiet finanzjarji li jirrigwardaw iċ-ċirkostanzi personali tagħhom.
Fost oħrajn il-pubbliku se jirċievi tagħrif biex jamministra aħjar id-dejn, kif juża l-flus minn jum għal jum u kif wieħed iżomm il-fondi siguri fost oħrajn.
Min-naħa tagħha l-Mapfre MSV Life se tkun qed tgħin billi tipprovdi kakolu tal-irtirar.
David Curmi, il-Kap Eżekuttiv tal-Maprfre MSV Life stqarr: “B’xejn ħa nipprovdu s-servizz lill-Gvern biex nibnu flimkien retirement calculator li nispera li jintuża u jkun prinċipali fis-suq.”
Qabel l-iffirmar, il-Ministru Michael Falzon qal li kull pajjiż fil-Punent qed jaffaċċja sfida ta’ popolazzjoni li dejjem qed tixjieħ. F’Malta l-anzjani jammontaw għal 25% tal-popolazzjoni, bil-Gvern joħroġ pensjonijiet għal madwar 93,000 persuna.
Il-Ministru Falzon sostna: “Hawnhekk għandek realtajiet demografiċi u għandek ukoll ir-realtà li għandek persuni li l-livell tal-għajxien tagħhom jkun tajjeb u hekk għandu jkun. Hawnhekk qed nimmiraw li jkun hawn għajnuna mal-pensjoni imma l-iktar ħaġa importanti li nħajru lin-nies minn kmieni biex jinvestu fil-futur tagħhom stess.”
