Żewġ żgħażagħ ta’ 24 u 16-il sena ġew arrestati mill-Pulizija ta’ Kontra d-Droga, bejn il-lejl tal-Ġimgħa u s-Sibt, fl-Isla.
Fi stqarrija, il-Pulizija qalet li dawn iż-żewġ żgħażagħ ġew arrestati f’dar privata fl-Isla. Fi tfittxija fid-dar, il-pulizija sabu 24 pakkett b’sustanza bajda li hija suspettata kokaina, 13-il pakkett suspettata droga eroina, blokka supettata raża tal-kannabis, kif ukoll instabu diversi oġġetti relatati mal-abbuż u traffikar tad-droga u ammont konsiderevoli ta’ flus kontanti.
Fi tfittxija li saret fuq iż-żagħżugħ ta’ 16-il sena, il-Pulizija sabet pakkett suspettat li fih hemm ħaxixa tal-kannabis u affarijiet oħra relatati mal-abbuż tal-istess droga.
Il-ġuvni ta’ 24 sena mistenni jitressaq il-Qorti l-Ħadd, filwaqt li ż-żagħżugħ ta’ 16-il sena mistenni jitressaq quddiem it-Tribunal tal-Ġustizzja aktar ‘il quddiem.
