Il-patoloġisti tal-lingwa u t-taħdit fi ħdan id-Dipartiment tal-Ispeech and Language tal-Kura Primarja, baqgħu għaddejjin b’ħidmiethom anki fil-pandemija tal-COVID-19.
Mindu bdiet l-imxija tal-Coronavirus f’pajjiżna, il-professjonisti li jaħdmu f’dan id-Dipartiment, baqgħu f’kuntatt u għenu lil madwar tmien mitt persuna, minn tfal sa adulti.
Huma għamlu dan permezz ta’ telefonati, e-mails kif ukoll b’sessjonijiet online fuq Skype u Zoom fost l-oħrajn.
Barra minn hekk isiru numru ta’ laqgħat fil-ġimgħa bejn il-professjonisti biex jiddiskutu l-materjal li jridu jqassmu.
Materjal li jindirizza d-diffikultajiet fid-diskors u l-lingwa li persuna jista’ jkollha minħabba xi diżabilità, mard jew inċident. Fost l-oħrajn, dawk li jużaw is-servizzi jkollhom problemi biex jifhmu l-lingwa, problemi fl-artikolazzjoni, fil-fonoloġija jew fil-grammatika, isibu diffikultà biex jiktbu u jaqraw, u anki problemi biex jibilgħu l-ikel.
Id-Direttur ta’ Allied Health Care Services Dr Rita Micallef, spjegat li l-maġġoranza tal-pazjenti huma tfal, u l-ħidma ssir b’sinerġija mal-għalliema fl-iskejjel.
Hija spjegat: “Aħna dejjem konna naħdmu ħafna mat-teachers u mal-LSEs u bqajna nagħmluh dan jiġifieri żammejna kuntatt magħhom. Ridna niggwidawhom ħalli ċertu materjal, kif dan jista’ jidħol fl-andament tas-sillabu li jkunu qegħdin jgħallmu huma d-dar biex kemm jista’ jkun is-sistema tibqa’ fuq livell multi-dixxiplinarju.”
Fil-pandemija qed jaħdmu mill-qrib ukoll mal-ġenituri.
Dr Micallef sostniet: “Hemm ukoll sistemi li riedu jiġu mistħarrġa, kif jien se ngħaddi dil-informazzjoni lill-ġenituri. Mela hawnhekk daħħalna wkoll it-training u l-coaching li wieħed irid jagħmel lill-ġenituri.”
Hija rrimarkat li hekk kif inbidlet sew il-ħidma minħabba ċ-ċirkostanzi straordinarji li qed ngħixu, hemm ukoll x’wieħed jitgħallem.
Dr Micallef kompla tgħid: “Kien hemm numru ta’ parents li rrappurtaw li t-tfal ikkalmaw iżjed kemm ilhom id-dar, li ċertu behaviours mhumhiex qegħdin jarawhom fit-tfal, u li kapaċi jaħdmu iżjed it-tfal mid-dar so din hija xi ħaġa li għandna narawha – it-tfal tagħna mhux robots, imma li t-tfal tagħna li jkunu esposti għall-ħajja naturali tal-familja, huwa tagħlim fih innifsu.”
