Illum suppost kelli nilbes il-libsa bajda tat-tieġ, iżda minflok ilbist l-uniformi bluna ta’ infermiera sabiex ngħin fil-ġlieda kontra l-Coronavirus fl-Isptar Mater Dei.
Qalet dan b’qalb maqsuma l-infermiera fil-ward ta’ Disney Land Daniela Vella, propju fil-jum li suppost kellha tgħid l-iva ta’ ħajjitha lill-għarus tagħha Matthew Muscat fuq l-artal tal-Knisja tal-Kapuċċini fil-Kalkara.
Ma’ dan l-istazzjon hija qalet li kieku dalgħodu flok il-ġenn tal-isptar kien ikollha l-ġenn tat-tieġ.
“Xħin qomt dalgħodu bdejt ngħid ara kieku bħalissa għandi ħafna ġenn, qiegħda għand il-hair dresser u forsi bdejt nagħmel il-make up nara l-lista tat-tieġ u l-għarus tiegħi qalli ma hemx x’tgħamel hekk kellu jkun. U illu flokk il-lista tat-tieġ kelli nilbes l-uniformi biex niġi għax-xogħol u naqdi lill-pazjenti.”
Daniela qaltilna li l-aħbar li l-attivitajiet tal-massa kellhom jitħassru kienet xokk kbir għalihom, hekk kif din fissret li riedet tiposponi t-tieġ. Qalet li f’temp ta’ ftit żmien kellhom isibu ġurnata u jmexxu l-affarijiet kollha li kienu pjanati għad-disgħa ta’ Ottubru li ġej.
“Kien naqa’ xokk, konna qed nistennew li xi darba ħa tolqot lill-pajjiżna għax ma kenitx kwistjoni ta’ jekk hux ħa tiġu f’pajjiżna imma meta se tiġi. Filfatt kellha tiġri propja xahar qabel it-tieġ tagħna kien xokk kbir bħal ma ħassew ħafna koppji oħra u kellna naraw ’se nagħmlu f’perjodu qasir.
F’messaġġ lil dawk il-koppji li qegħdin fis-sitwazzjoni tagħha bħalissa, l-infermiera b’qalb tad-deheb qaltilhom sabiex iżommu sodi għaliex l-imħabba ma’ tiġix iċċelebrata f’jum wieħed biss iżda tul ħajjithom kollha.
“Il-messaġġ tiegħi f’din il-ġurnata huwa li jagħmlu kuraġġ u l-imħabba ta’ bejniethom żgur ma’ tiġix iċċlebrata biss f’jum it-tieġ, vera hija l-ġurnata l-kbira imma l-imħabba tagħhom jistgħu juruha bejniethom u jibqgħu b’saħħithom bejniethom u jagħmlu kuraġġ lil xulxin, dejjem bl-għajnuna tal-Mulej.”
