Għal xi tipi t’għasafar, l-eqqel tas-sajf ifisser il-bidu tal-passa. Għasafar li fi triqithom mill-Ewropa lejn l-Afrika, isibu rifuġju fir-riservi naturali Maltin.
BirdLife Malta innutat kif pajjiżna fis-sajf jilqa’ fih numru t’għasafar tal-plajja, li jkunu l-ewwel li jagħmlu dan il-vjaġġ biex fil-Ħarifa jsibu ruħhom f’temperaturi iktar sħan minn dawk Ewropej.
Bħalissa, għal sena oħra, ir-Riservi Naturali tal-Għadira u s-Simar qed jipprovdu rifuġju għal dawn l–ewwel għasafar tal-passa u dan is-sajf BirdLife Malta diġà rreġistrat numru konsiderevoli ta’ speċi ta’ għasafar tal–plajja li żaru Malta.
Bl-aktar riċenti minn dawn kienu l-Paletti, bl-Ingliż Spoonbills, li fl-aħħar jiem kienu fir-Riserva Naturali tas–Simar.
Dawn huma għasafar rari li diffiċli titfixkilhom ma’ oħrajn minħabba l-munqar twil u ċatt li jiddistingwihom, fil-forma ta’ mgħarfa li jużawh biex isibu l-ikel fl-ilma baxx.
Filfatt dan l-għasfur issibu f’ħabitat fejn ikun hemm l-għadajjar b’ilma baxx, u jbejjet f’kolonji fis-siġar jew fil-qasab.
Għasafar oħra tal-plajja li ġew osservati fir-riservi ta’ BirdLife Malta tul Lulju u Awwissu kienu jinkludu numru ta’ frieħ ta’ Vellerani, bl-Ingliż Glossy Ibises, li qattgħu numru ta’ sigħat fir-riserva tal-Għadira fil-bidu ta’ dan ix-xahar.
L-aktar fattur li jiddistingwi lill-Velleran hu r-rix, b’kuluri li jidhru qed ikanġu meta tħares lejh minn angoli differenti. Dan flimkien mal-munqar li wkoll hu partikolari, u li dan lgħasfur jużah biex ifittex l-ikel fl-ilma.
Dan l-ispeċi kienu nnutati f’pajjiżna flimkien m’oħrajn fir-riżervi naturali, b’uħud li sena wara l-oħra mhux talli jpassu f’pajjiżna, imma saħansitra jbejtu hawn.
