Il-Kap tal-Partit Nazzjonalista Adrian Delia akkuża deputati qrib il-fazzjoni tal-ex Kap Nazzjonalista Simon Busuttil bi problemi kbar u kontinwi. Qal li dawn ma riedux li l-Partit jerġa’ lura għand in-nies wara li nħakem minn klikka żgħira ta’ nies.
Adrian Delia stqarr: “Dak il-messaġġ għadda minn passaġġ ta’ sentejn li kien mimli minn problemi kbar kontinwi minn dawk li ma jridux jaċċettaw.”
Delia qal dan f’intervista fuq il-midja Nazzjonalista l-Ħamis filgħaxija wara sejħa oħra mid-deputati tal-fazzjoni Busuttil biex iwarrab mit-tmexxija.
Huwa akkużahom li flok għenuh komplew ifixkluh. Delia sostna: “Min ma jridx jaċċetta l-fatt li inti trid timxi dik it-triq id-dritta mbagħad ifixel u mhux jgħin.”
Qal li fil-Partit Nazzjonalista, il-poter jilgħab ħafna logħob stramb u t-taqbida li għaddej minnha l-partit Nazzjonalista ma bdietx minħabba l-istħarriġ tal-Ħadd.
Delia sostna: “Xejn ma jiġri minn ġurnata għal oħra u xejn ma jiġri għax sar survey.”
Tenna li bħal Eddie Fenech Adami se jibqa’ fit-tmexxija tal-partit minkejja li kien hemm ħafna nies kontrih.
Delia li fl-aħħar xhur spiċċa maħkum min-nies li llum qed isejħu għat-tkeċċija tiegħu mill-partit, żied jakkużahom li ħadmu għall-firda flok l-għaqda. Huwa kompla jgħid: “Jekk irridu l-għaqda ma rridux ngħidu li rridu l-ghaqda imma naħdmu kontra tagħha.”
Qal li għamel minn kollox biex jibni l-pontijiet, iżda dawn l-aħnqas pass ma riedu jagħmlu. Delia tenna: “Irid ikun hemm xi hadd li jekk int għamilt 100 pass jagħmel wieħed.”
Tenna li minkejja li kien hemm deputati li aċċettawh u bdew jgħinu, min ħafna u min ftit, kien hemm oħrajn li baqgħu determinati kontrih. Delia qal: “Imma kien hemm min baqa’ determinat li l-PN ma jmurx lura għand in-nies.”
Delia qal li f’sitwazzjoni bħal din, faċli jkisser u jtajjar: “Huwa faċli li meta tiġi attakkat tirrreaġixxi tati lura u tkisser u ttajjar.”
U kważi 3 snin wara li ħa tmun tal-Partit Nazzjonalista, Delia qal li issa jridu jiddeċiedu liema Partit Nazzjonalsita jridu. Huwa qal: “Naħseb illum wasalna fil-parti tat-triq fejn irrid nistaqsu liema Partit Nazzjonalista?”
Dan wara li fi kliemu stess il-bidla li wiegħed…. baqgħet ma saritx.
