Il-Qorti Kriminali kkonfermat is-sentenza tal-ħelsien mill-arrest ta’ Lorin Scicluna u Francesco Fenech, wara li l-prosekuzzjoni talbet lill-Qorti sabiex tirrevoka din id-deċiżjoni.
Iż-żewġ suldati huma akkużati bil-qtil ta’ Lassana Cisse Souleymane f’Ħal Far, f’April li għadda.
Jinsabu akkużati wkoll bl-attentat ta’ qtil ta’ żewġ immigranti oħra.
Aktar kmieni dan ix-xahar, Scicluna u Fenech ingħataw il-ħelsien mill-arrest, fuq depożitu ta’ €30,000 u garanzija personali ta’ €20,000. Barra minn hekk huma jridu jiffirmaw kuljum fl-għassa.
L-Imħallef Edwina Grima qalet li ż-żewġ akkużati qed jobdu l-kundizzjonijiet imposti fuqhom u ma hemmx riskju ta’ tbagħbis fl-evidenza anki għax ix-xhieda prinċipali, xehdet kollha.
