F’inqas minn sena, naqas drastikament il-ħin ta’ stennija għal appuntamenti fid-Dipartiment tal-Medical Imaging fl-Isptar Mater Dei.
Meta wieħed iqabbel il-ħin ta’ stennija f’April ta’ din is-sena, ma’ dak f’Ġunju tas-sena l-oħra, jidher li l-ikbar differenza seħħet fl-appuntamenti għal Ultrasounds.
Filfatt, filwaqt li f’Ġunju tas-sena l-oħra l-ħin ta’ stennija għal dan it-test kien ta’ ħmistax-il xahar, f’April ta’ din is-sena, dan niżel għal xahar wieħed biss.
Fejn jidħlu CT Scans, il-ħin ta’ stennija sena ilu kien ta’ għaxar xhur. Sa xahrejn ilu, dan niżel għal erba’ xhur.
Għal MRI, il-pazjent ried jistenna sittax-il xahar. F’April ta’ din is-sena, l-appuntamenti bdew isiru fi żmien disa’ xhur.
F’intervista ma’ ONE NEWS, il-Kap tad-Dipartiment Kenneth Saliba, spjega li d-domanda għat-testijiet qed tiżdied b’medja ta’ ħmistax fil-mija kull sena.
“Grazzi għall-management ta’ Mater Dei u l-Ministeru, għamilna target li nippruvaw il-waiting times innaqsuhom kemm jista’ jkun għal average ta’ erba’ xhur. Naf li erba’ xhur xorta jinstema’ twil għal ħafna nies imma ma ninsewx li bdejna minn sentejn u li niġu erba’ xhur huwa tajjeb.”
Is-Sur Saliba saħaq li mhux aċċettabbli li min ikollu bżonn appuntament urġenti ma jinqediex, u qal li dik hija problema li żżid il-kumplessità tas-servizzi li joffri d-Dipartiment.
“Irridu nżommu f’moħħna li hawnhekk il-volum tax-xogħol huwa għoli ħafna, qed nitkellmu fuq 1,000 CT Scan fil-ġimgħa, 1,000 Ultrasound fil-ġimgħa, 600 MRI fil-ġimgħa voldieri dawn huma numri fenomenali u mhux inlaħħqu mad-domanda per eżempju fil-każ tal-MRI għandna waiting list naqra twila għaliex filwaqt li nistgħu nagħmlu 600 scan fil-ġimgħa, ikollna domanda ta’ 900 fil-ġimgħa.”
B’dawn in-numri fl-isfond, id-Dipartiment tal-Medical Imaging ħadem u qed jaħdem bla heda biex jindirizza l-bżonnijiet.
Dan fost l-oħrajn bl-investiment fl-apparat, billi fix-xhur li ġejjin se tiġi installata t-tielet magna tal-MRI.
Biex tiżdied l-effiċjenza fir-riżultat, eluf ta’ scans jintbagħtu fil-privat u anki Għawdex.
Dan filwaqt li qed isir investiment bla preċedent fir-riżors uman.
Sforzi li qed iħallu sodisfazzjon fost il-pazjenti, hekk kif stħarriġ li sar fost tliet mitt persuna li ġew bżonn CT Scan ix-xahar li għadda, wera li disgħin fil-mija minnhom kienu sodisfatti Immens, u għaxra fil-mija sodisfatti.
“Kellna complaints tipo li kien hemm tingiża biex ħa l-kulur li dik it-tip ta’ complaint ngħid mela vera kien tajjeb għax it-tingiża ma tistax tevitaha sfortunatament voldieri jekk dak biss kien hemm biex niccomplainjaw, jidher li sejrin tajjeb.”
