Il-Partit Nazzjonalista nqabad f’gidba kbira oħra meta l-Ħamis filgħaxija ħareġ stqarrrija b’reazzjoni għal storja ta’ ONE News li fiha qal li l-kumitat Sezzjonali tal-Mosta ma approva l-ebda mozzjoni ta’ sfiduċja fit-tmexxija tal-Partit Nazzjonalista.
Madankollu lanqas laħqu għaddew tnax-il siegħa li sorsi fil-Partit Nazzjonalista żvelaw magħna ittra uffiċjali li bagħat il-kumitat sezzjonali Mosti lill-ogħla tmexxija tal-Partit Nazzjonalista li fiha ddikjara li impossibbli li jibqgħu siekta.
Din l-ittra ffirmata mill-President tal-Kumitat tal-Partit Nazzjonalista Norvin Spiteri li hu ħabib kbir ta’ Roberta Metsola, qalet ċar u tond li waqt il-laqgħa tal-Erbgħa li għadda, il-kumitat iddiskuta s-sitwazzjoni preżenti tal-Partit u xtaq iwassal messaġġ ċar lill-amministrazzjoni u lit-tmexxija.
Fil-fatt, f’din l-ittra il-kumitat Mosti talab lit-tmexxija sabiex jerfgħu r-responsabbiltà taż-żewġ telfiet kbar li ġarrab il-Partit fl-elezzjoijiet ta’ Mejju li għadda għax tilfu l-fiduċja tagħhom ukoll.
“F’ĠIEĦ IS-SEWWA U F’ĠIEĦ IL-PARTIT TAGĦNA, NITOLBU BIEX KULĦADD JERFA’ R-RESPONSABBILTÀ GĦAX IL-FIDUĊJA TAGĦNA ISSA TLIFTUHA WKOLL”
L-ittra li ntbagħatet lill-Kap Nazzjonalista Adrian Delia, is-Segretarju Ġenerali Clyde Puli, il-Viċi Kapijiet, lill-Presidenti tal-Eżekuttiv, l-Amministrattiv u lill-Kunsill Ġenerali u lill-uffiċċju tal-informazzjoni qalet ukoll li d-dikjarazzjoni ta’ Clyde Puli li l-Partit Nazzjonalista kellu riżultat tajjeb kienet xokkanti. Fl-istess waqt akkużaw lit-tmexxija b’nuqqas ta’ onestà. Sostnew li dan mhux il-mod kif għandu jimxi l-partit.
“IL-PARTIT GĦANDU JARA GĦAX ŻDIED ID-DISTAKK U MHUX ISIB L-ISKUŻI. IT-TMEXXIJA GĦANDHA TKUN RESPONSABBLI TAL-AZZJONIJIET TAGĦHA U TAGĦTI SPJEGAZZJONIJIET TAL-FATTI.
L-ittra qalet li d-dikjarazzjoni ta’ Puli qajmet rabja kbira fost l-elettorat Nazzjonalista.
Il-Kumitat Mosti kkritika wkoll lid-deptuat Nazzjonalista Kristy Debono li fi kliemhom tefgħet lill-Partit Nazzjonalista f’dawl ikrah.
Il-kumplament tal-ittra li hija miżgħuda bi krititka fil-konfront tal-ogħla tmexxija tal-Partit Nazzjonalista li tkellmet ukoll dwar l-elezzjoni interna għall-co option tas-siġġu li battal David Stellini. Qalu li Jean Pierre Debono rebaħ elezzjoni fuq Kevin Cutajar b’voti li mhux suppost kienu validi. Qalu wkoll li kienet xokkanti li Clyde Puli pprova jħajjar aktar kandidati sabiex jieħdu post Cutajar fil-Parlament.
Intant, bi sforz mgħaġġel sabiex it-tmexxija terġa’ jieħu ftit ġieħ fil-Partit Nazzjonalista, Jean Pierre Debono ħeġġeġ il-kumitati sezzjonali l-oħra sabiex joħorġu mozzjonijiet favur Adrian Delia.
Madankollu dan l-eżerċizzju sfurzat wassal lill-Partit Nazzjonalista f’mozzjoni oħra ta’ sfiduċja f’Adrian Delia li din id-darba ġiet mill-Kumitat Nazzjonalista ta’ Raħal Ġdid.