Kellha tkun ġurnata l-isptar mhux tas-soltu għat-tlieta u ħamsin tifel u tifla li bħalissa qed jingħataw il-kura f’waħda mis-swali tat-tfal fl-Isptar Mater Dei, hekk kif karattri tal-istazzjon Nickelodeon żaruhom u qassmulhom xi rigali.
Din l-attività saret lejlet l-avveniment Nickelodeon Treasure Hunt li se tittella’ għall-ewwel darba madwar Malta. Lionel Gerada, id-Direttur tal-Avvenimenti fi ħdan l-Awtorità Maltija għat-Turiżmu, spjega li l-organizzaturi ta’ din il-kaċċa għat-teżor xtaqtu li anke dawk it-tfal li għal xi raġuni jew oħra ma jistgħux jattendu, jieħdu togħma ta’ dan l-avveniment.
In-Nickelodeon Treasure Hunt diġà ġibdet l-attenzjoni ta’ ħafna familji maltin u barranin li fil-btajjel tal-Għid diġà ppjanaw biex jieħdu lil uliedhom għal dawn l-attivitajiet.
Fost dawn se jkun hemm tfittxija għal SpongeBob fl-Aquarium Nazzjonali, pranzu ħelu mal-famużi Ninja Turtles fis-Suq tal-Belt, u dwell ma’ Nella l-Prinċipessa fit-teatru ta’ San Ġakbu.
“Hija festa għat-tfal u għal-familja kollha. Inħeġġu lil kulħadd jattendi għada fil-Belt Valletta fejn se jkun hemm shows fi Pjazza Teatru Rjal u Spazju Kreattiv. Il-Ħadd għandna il-parata fi Triq ir-Repubblika l-Belt, u se jkun hemm karru bil-karattri kollha. Se tkun festa mill-isbaħ” qal id-Direttur tal-Avvenimenti fl-MTA, Lionel Gerada.
