Il-jum tal-Ħadd sebaħ ikkulurit fi Triq il-Kbira San Ġużepp, il-Ħamrun. F’temp li ppermetta, bosta tfal u anke kbar lebsin kostumi kkuluriti segwew l-ispettakllu fit-triq mtella’ mill-Kunsill Lokali tal-Ħamrun.
ONE News tkellem ma’ tfal lebsin kostum ta’ karattri favuriti tagħhom, spjegawlna dwar il-ferħ li jġib miegħu żmien il-karnival. Tifla liebsa ta’ Astrid mill-film animat “How To Train Your Dragon 3” qaltilna għalfejn għażlet il-kostum tagħha.
Tfal preżenti qalu: “L-ewwel meta ħareġ il-one u t-two ilbist tagħha wkoll, imma issa x’ħin ħareġ it-three bidlet il-kostum allura ilbist bħalha u missieri għamel dan il-kostum kollu.”
Tifel ieħor liebes ta’ power ranger rringrazzja lill-organizzaturi tal-karnival, u spjega kif it-tfal ikunu qed jistennew b’ħerqa dan iż-żmien ikkulurit.
Xi tfal qalu wkoll: “Nixtieq ngħidilhom thank you talli għamlu x-xogħol bina għax joqogħdu jagħmlu dawn l-affarijiet kollha u hija ħasra meta tiġi x-xita.”
Is-Sindku tal-Ħamrun qal li kull sena din l-attività qed dejjem tikber. Din is-sena hija r-raba’ darba li qed isir dan l-ispettaklu. Semma wkoll kif isib il-kooperazzjoni tar-residenti Ħamruniżi biex din l-attività tkun dejjem ta’ suċċess.
Is-Sindku tal-Ħamrun Christian Sammut qal: “Ikollna konkorrenza tajba mir-residenti, ir-residenti jixtiequ dawn l-affarijiet anke tan-negozji għax jieħdu pjaċir b’dan l-andament. Hija xi ħaġa importanti li naħdmu id f’id għax jekk ma taħdimx id f’id dawn l-affarijiet ma jirnexxux.”
