Bud Spencer, li ismu propja huwa Carlo Pedersoli, miet illum fl-età ta’ 86 sena.
L-aħħar kelma tiegħu kienet ‘grazzi’, skont bintu li kkomunikat l-aħbar wara nofsinhar.
Ħafna se jibqgħu jiftakru lit-Taljan bħala r-raġel ġgentesk li dejjem kien jinvolvi ruħu f’xi ġlieda tajba ma’ sieħbu Terence Hill. Forsi ftit jafu li l-karriera tiegħu bdiet bħala għawwiem professjonali. Huwa gradwa fil-liġi u kien pilota tal-ajruplani u l-ħelikopters kummerċjali. Kien jikkontribwixxi lejn ħafna organizazzjonijiet li jgħinu lit-tfal.
Spencer u l-karattri li kien jinterpreta se jibqgħu fil-memorja ta’ ħafna, għaliex jirrappreżentaw żminijiet li għaddew, meta t-televiżjoni kienet differenti ferm.
