11-il immigrant iddaħħlu fil-bażi marittima tal-Forzi Armati ta’ Malta llum għall-ħabta tas-13:00. Il-Ministru għall-Intern Michael Farrugia, f’kummenti ma’ dan l-istazzjon, ikkonferma li l-immigranti se jittieħdu lura Spanja fil-jiem li ġejjin.Huma ġew salvati wara li kienu maqbuda bejn sema u ilma għal madwar għaxart ijiem. Kienet dgħajsa tas-sajd Spanjola bl-isem ta’ Santa Madre de Loreto li salvat 12-il immigrant mil-Libja, b’wieħed minnhom iddaħħal Malta lbieraħ filgħaxija.
L-immigranti ddaħlu Malta wara li sar qbil bejn il-Gvern Malti u dak Spanjol sabiex l-immigranti salvati jittieħdu kollha lejn Spanja.
B’rabta mal-11-il immigrant li ddaħħlu llum, il-Pulizija kkonfermat ma’ ONE News li huma kollha rġiel, b’diversi minnhom huma ta’ nazzjonalità differenti.
L-ebda immigrant li ddaħħal illum ma kellu bżonn assistenza medika.
