Paul Allen, ko-fundatur ta’ Microsoft, miet fl-eta ta’ 65 sena minn kumplikazzjonijiet b’kanċer fl-għoqiedi limfatiċi.
Huwa kien żvela li reġa ħakmu l-kanċer ġimgħatejn ilu, wara li kien irċieva l-kura għalih fl-2009.
Allen kien qal li hu u t-tobba tiegħu kienu ottmisti fuq il-kura.
Il-ko-fundatur l-ieħor ta’ Microsoft, Bill Gates, qal li jinsab b’qalbu maqsuma bil-mewt ta’ wieħed mill-iktar ħbieb għeżież tiegħu.
Fi stqarrija maħruġa fil-jum tat-Tnejn li kkonfermat il-mewt tiegħu, oħtu Jody ddeskrivietu bħala individwu eċċezzjonali fuq kull livell.
