Waqt li l-fazzjoni tal-eks kap nazzjonalista Simon busuttil jinsabu għaddejjin b’laqgħat f’uffiċini fil-Belt biex itajru lil Adrian Delia minn Kap tal-Partit Nazzjonalista, Delia qed ikollu jlaqqa’ n-nies tiegħu tard bil-lejl għax kull manuvra fl-uffiċċju tiegħu qed tasal għand l-ex kap Simon Busuttil.
Tard it-Tlieta filgħaxija, ONE News mar quddiem id-Dar Ċentrali fejn segwa l-paniku li ħakem lit-tmexxija f’Tal-Pietà.
Kienet lejla iebsa dik tat-Tlieta filgħaxija għall-Kap tal-Partit Nazzjonalista, Adrian Delia. Miegħu is-Segretarju Ġenerali Clyde Puli u anke l-Kap Eżekuttiv tal-media tal-PN Pierre Portelli.
Il-laqgħa kienet maħsuba biex Delia jieħu idea ta’ x’appoġġ għandu fl-eżekuttiv tal-Partit Nazzjonalista, biex dak li għamel fil-konfront ta’ Simon Busuttil fl-amministrattiv tal-Partit, issa jagħmlu wkoll f’din l-istruttura tal-partit.
Wieħed wieħed bdew jibagħtu għall-membri tal-eżekuttiv tal-Partit Nazzjonalista bi Clyde Puli u Pierre Portelli jipprovaw ifemuhom għaliex hija tajba d-deċiżjoni tal-Kap li jissospendi lil Busuttil.
Wara li jkunu bdew ix-xogħol huma, eventwalment beda jidħol Adrian Delia u jgħid tiegħu wkoll.
ONE NEWS jista’ jiżvela li r-reazzjonijiet kienu mħallta. Min qal lill-Kap li jaqbel miegħu u min qallu li għaġġel anke jekk forsi seta’ jifhem il-ħsieb tiegħu. Iżda, kien hemm ukoll laqgħat li matulhom l-ilħna għolew u l-atmosfera xejn ma kienet serena. Lil Puli u Portelli kien hemm min waqqfilhom b’mod sod.
Tant li sa meta spiċċaw jiltaqgħu ma’ dawk li aċċettaw li jmorru l-istamperija kien għadu mhux ċar x’inhi s-sitwazzjoni.
Interessanti li tul il-ħin li segwejna minn quddiem id-dar ċentrali n-nies fl-uffiċċju dehru li ma kellhomx sabar f’ġisimhom iduru ma’ kull rokna tal-uffiċċju ta’ Delia.
Il-Kap Nazzjonalista għal aktar minn darba deher jiftaħ idejh filwaqt li jippasiġġa mal-uffiċju, filwaqt li beda jipprova jirraġuna ma’ min kellu quddiemu.
Intant, fi żviluppi oħra l-għaxar deputati li ħarġu jagħtu l-appoġġ tagħhom lil Simon Busuttil, qegħdin jitfgħu pressjoni fuq il-Kap Nazzjonalista Adrian Delia sabiex ilaqqa’ Grupp Parlamentari.
Waqt il-grupp parlamentari mistennija ssir pressjoni kbira fuq il-Delia sabiex jirtira d-deċiżjoni tiegħu li jitlob għat-tkeċċija ta’ Simon Busuttil.
