“Wara operazzjoni ta’ suċċess, l-agħar għadda u Hugo qed jirkupra tajjeb.”
Hekk kiteb fuq Facebook Isaac Chetucuti, ħu Hugo Chetcuti, l-imprenditur Malti li tard ilbieraħ filgħaxija qala’ daqqiet ta’ sikkina f’Paceville.
Isaac spjega kif Hugo jinsab f’idejn tajba u mdawwar bil-qraba u l-ħbieb tiegħu. Hu rringrazzja lil kull min bagħat messaġġ ta’ fejqan u talab biex iżommu lil ħuh fit-talb tagħhom.
Hugo Chetcuti qala’ daqqiet ta’ sikkina minn allegat Serb ilbieraħ filgħaxija f’Paceville. Chetcuti qed jinżamm fit-Taqsima tal-Kura Intensiva wara li ħareġ mill-operazzjoni u ġie ddikjarat li m’għadux fil-periklu tal-mewt.
