Passio Christi hija CD ġdida ta’ marċi funebri kompożizzjoni ta’ Mro. Saviour Seychell li ġiet imnedija fit-18 ta’ Frar 2018 fil-Każin tal-Banda Beland taż-Żejtun. Fiha nsibu sett ta’ għaxar marċi li disgħa minnhom huma ġodda u qatt ma ġew irrekordjati. Għalkemm dawn il-marċi huma tal-istess kompożitur, kollha huma varjati u kull marċ għandu l-istil tiegħu.
Fl-1983, Saviour beda l-istudju mużikali tiegħu ma’ Mro. Paul Buttigieg fil-każin tal-Banda Beland taż-Żejtun. Wara kompla jistudja ma’ Mro. Ugo Buhagiar sakemm ħareġ idoqq il-kurunetta mal-Banda Beland fil-Ġimgħa l-Kbira tal-1985. Hu kkompona l-ewwel marċ tal-festa fl-1990. Wara dal-marċ hu kiteb għad ta’ marċi festivi u funebri.
Fl-2003, Saviour beda jistudja t-tejorija u l-armonija għand Mro. Ray Sciberras, is-surmast attwali tal-Banda Beland. Wara li kiseb il-Grade 8 kompla jistudja l-istorja tal-mużika, il-kontrapunt u l-orkestrazzjoni mal-istess Mro. Sciberras. Fi tliet snin konsekuttivi mill-2011 – 2013, mil-London Collage of Music, Saviour kiseb id-Dip.Mus LCM, A.Mus.LCM u L.Mus.LCM.
Is-CD Passio Christi ġiet irrekordjata mis-sound engineer Alan Schembri fil-każin tal-Banda Santa Katarina taż-Żurrieq. Għal aktar informazzjoni u biex takkwista dis-CD, tista’ tibgħat messaġġ fuq 77405497 / 79638297 jew iżżur Facebook Page Marċi Funebri Passio Christi.
