95 fil-mija tax-xogħol fuq il-proġett tal-Kirkop Tunnels and Airport Intersection Project huwa lest.
Dan ħabbru l-Kap Eżekuttiv tal-Infrastructure Malta, Ivan Falzon, waqt konferenza li fiha ta rendikont tal-ħidma li qed tagħmel din l-aġenzija tal-Gvern fuq iż-żewġ proġetti maġġuri tal-Junction ta’ Ħal Luqa u l-proġett ta’ ħdejn ir-roundabout tal-ajruport, li jinkludi wkoll il-mini ta’ Ħal Kirkop.
Is-Sur Falzon spjega li x-xogħol huwa mistenni li jkun tlesta kollu sal-aħħar ta’ April skont kif kien skedat.
Huwa żied jgħid li t-tlestija se sseħħ proprju qabel il-perjodu meta pajjiżna jara qabża fl-għadd ta’ turisti.
Fuq il-proġett tal-Junction ta’ Ħal Luqa, is-Sur Falzon ħabbar li iktar minn 65 fil-mija tax-xogħlijiet huma lesti. Barra minn dan, ix-xogħlijiet fuq il-flyover mistennija jkunu lesti sa Mejju li ġej, filwaqt li x-xogħlijiet fuq il-mina se jkunu lesti sa Ġunju.
Dawn iż-żewġ proġetti se jnaqqsu l-ħin tal-ivvjaġġar b’sa erbgħa u sebgħin fil-mija f’kull direzzjoni tul din ir-rotta.
Se jeliminaw ukoll żewġ żoni magħrufin li kienu suxxettibbli għall-inċidenti, billi jneħħu l-ħtieġa li l-vetturi jaqsmu kontra xulxin fiż-żewġ roundabouts.
Fl-istess waqt, permezz ta’ faċilitajiet aktar siguri, se jonqsu wkoll ir-riskji ta’ inċidenti għal dawk li jkunu għaddejjin f’din iż-żona bil-mixi jew bir-rota.
Dawn iż-żewġ proġetti se jwasslu ukoll għal titjib sinjifikanti fil-kwalità tal-arja f’Ħal Luqa, fil-Gudja, u fi nħawi oħrajn fil-viċin.
Ġie spjegat ukoll kif ix-xogħol baqa’ għaddej minkejja li kellu jsir xi tibdil minħabba sejbiet arkeoloġiċi.
Intant, mill-ġimgħa dieħla, il-karreġġjata fid-direzzjoni lejn il-mina ta’ Ħal Kirkop se tkun magħluqa.
Dan sabiex issir l-aħħar fażi ta’ dan il-proġett infrastrutturali.
Il-perit tal-proġett, Anton Zammit qal li,“Bħalissa għaddej xogħol fuq naħa minnhom. Il-ġimgħa d-ieħla se jsir xogħol fuq in-naħa l-oħra. Bażikament, il-ġimgħa dieħla se jingħalqu żewġ karreġġjati, waħda tad-dħul u l-oħra għall-ħruġ barra mill-mini taż-Żurrieq, biex inkunu nistgħu naħdmu u nagħlqu din is-sezzjoni ta’ dan il-proġett.”
Il-Perit Zammit komplja jispjega wkoll li, biex ikompli jiġi iffaċilitat it-traffiku għad-dħul u l-ħruġ mill-mina ta’ Ħal Kirkop, parti mir-roundabout ta’ biswit l-ajruport se tkun magħluqa biex ikun hemm immaniġġjar tat-traffiku aħjar u jiġu mminimizzati l-perikli.
