Aktar minn 40,000 persuna madwar l-Ewropa jmutu bl-influwenza bil-maġġoranza tagħhom ikunu persuni vulnerabbli bħal anzjani u pazjenti morda b’mard kroniku.
Is-Supretendent għas-saħħa pubbliku, il-Professur Charmaine Gauci, qalet li minn tagħrif li ġabru mit-tobba tal-familja, jidher li l-passa din is-sena bdiet bil-mod iżda mistnnija tilħaq il-qofol tagħha l-ġimgħa d-dieħla.
“Mis-sorveljanza li għamilna s’issa rajna li l-influenza bdiet nil-mod il-mod mill-bidu ta’ Ottubru u bil-mod il-mod qegħda tiela ‘l fuq fejn aħna nkunu qed nistennew li nilħqu l-peak tal-influenza propju bħal dan iż-żmien, jew inkella l-ġimgħa d-dieħla”.
Biex jilqa’ għal dan, il-Gvern ħejja pjan ta’ kontiġenza li kien jinkludi x-xiri ta’ 100,000 vaċċin. Il-Professur Gauci qalet li sa issa kienu ‘l fuq minn 85,000 persuna li ħadu t-tilqima bħala prevenzjoni.
Hija qalet li fadal 15,000 vaċċin li għadu ma ttieħdux u appellat lil dawk li għadhom ma ħaduhiex biex jieħdu t-tilqima:
“Li tieħu tal-inqas it-tilqima biex tipprova kemm jista’ jkun tilqa’ għal din il-mewġa tal-influwenza, għaliex nafu wkoll li l-istaġun idum għaddej qisu sa April”.
ONE News tkellem ukoll mat-tabib tal-familja Jan Chircop fejn qalilna li dawn iż-żminijiet huma l-aktar li jaraw żieda ta’ każijiet ta’ influwenza fost ix-xhur l-oħra tas-sena.
“Bħalissa jkollna surge ta’ każijiet ta’ influwenza sew minħabba t-tibdil fil-klima, f’daqqa waħda jibda t-temp tax-xitwa biex ngħidu hekk fejn tibda dik is-sirda, kesħa u riħ. Kif ukoll fi żmien il-Milied ikollna ħafna attivitajiet, in-nies jitħalltu, allura aktar u aktar hemm iċ-ċans li jittieħed il-mard.”
Mistoqsi dwar il-kura, it-Tabib Chircop semma bosta rimedji fosthom dawk naturali li persuna tista’ jieħu biex isaħħaħ is-sistema tal-immunità fosthom l-għasel, it-tumeric u l-ġinġer.
“Jeżisti wkoll estratt ta’ fjura li ħafna nies ma jafux biha hija echinacea, li tibboostja l-immune system aktar mill-affarijiet li semmejt. Is-soltu ssib tixtriha f’tea bags per eżempju minn supermarkets u anke l-ispiżeriji. Jeżistu kapsoli b’estratt tal-echinacea, li kif qed ngħidu tibboostja l-immune system ħalli dak li jkun ma jaqbdux”.
Madankollu t-tabib Chircop saħaq fuq l-importanza tal-vaċċin u spejgalna li ħafna jagħżlu li ma jieħdux it-tilqima għax ma jagħmlux distinzjoni bejn riħ u influwenza li tista’ tkun fatali.
