Il-miżuri tal-Gvern għan-negozji wasslu biex kwazi 77 elf impjieg kienu salvati hekk kif dawn irrikorrew għal għajnuna tal-Gvern fi ħlas tal-pagi.
Dan intqal waqt konferenza tal-aħbarijiet mill-Ministru għall-Ekonomija Silvio Schembri u l-Kap Eżekuttiv ta’ Malta Enterprise Kurt Farrugia.
Minn meta nfetħu l-iskemi, waslu kważi sbatax-il elf applikazzjoni minn kumpaniji, li jaħdmu għal rashom u negozji oħra. Dawn applikaw biex jirċievu jew tmien mitt ewro għall ħaddiema full time jew 500 ewro għall ħaddiema part time.
Bejniethom il-ħaddiema full-time f’din l-iskema ħadu kważi ħames miljun ewro filwaqt li iktar minn tliet mitt elf ewro daħlu fil-bwiet tal-ħaddiema part-time.
Intqal ukoll li saru 298 applikazzjoni għall-iskema tax-xogħol mid-dar. Minnhom ġew approvati 77 u diġa ingħataw fondi lil 64 mis-77 applikazzjoni. Dan b’nefqa ta’ iktar min wieħed u tmenin elf ewro.
Il-miżura tal-leave tal-kwarantina wkoll kellha konkorrenza tajba, hekk kif 1,298 applikazzjoni kienu sottomessi, b’491 ikunu approvati b’nefqa ta’ kważi ħamsin elf ewro oħra.
Il-Ministru Silvio Schembri sostna li l-Gvern se jkompli jinvesti mal-mitt miljun ewro kull xahar fin-negozji ħalli pajjiżna, bħal ma kien lest li jilqa’ għal dawn iż-żminijiet diffiċli, ikun lest li jitlaq jiġri meta tgħaddi l-kriżi.
“Fil-jiem u ġimgħat li ġejjin ħa nkunu qegħdin nerġgħu nħabbru waħda wara l-oħra ħalli nergħu naraw kif l-investiment li kien qed isir fil-pajjiż ikompli jsir. Din is-sitwazzjoni ħolqot opportunitajiet fejn aħna bħala pajjiż u bħala gvern dħalna fihom u qed nitkellmu man-nies interessati ħalli jekk Alla jrid fil-ġranet li ġejjin inkunu nistgħu nħabbru investiment ġdid għal pajjiżna.”
Min-naħa tiegħu il-Kap Eżekuttiv ta’ Malta Enterprise qal li filwaqt li n-negozji għandhom is-serħan tal-moħħ, hemm ir-responsabilità li l-fondi pubbliċi jkunu użati b’mod tajjeb.
“Il-persuni li japplikaw għal wage supplement inkunu qed niċċekjaw humiex part time jew full time. Ovvjament il-main income tagħhom ikun intitolat għal covid wage supplement. Fejn ikunu qegħdin japplikaw għat-tnejn li huma aħna nikkuntattjawhom jew ninfurmawhom li se jkunu qed jieħdu l-covid wage supplement fuq il-main income tagħhom li ġeneralment ikun il-full time jew il-part time li jkun il-main income tagħhom.”
Intant meta mistoqsi mill-ġurnalisti dwar is-sitwazzjoni fl-Air Malta, il-Ministru Schembri qal li x-xenarju dinji tal-avjazzjoni nbidel kawża tal-pandemija.
Qal li l-Gvern m’hu se jħalli lil ħadd iżomm lill-Air Malta ostaġġ iżda ser jittieħdu d-deċiżjonijiet biex din tibqa’ ttir u tkompli tikber.
