Fl-aħħar 24 siegħa feġġew 7 każijiet ġodda ta’ Coronavirus fost 738 test.
Is-Supretendent tas-Saħħa Pubblika, il-Professur Charmaine Gauci spjegat kif 6 minn dawn il-każijiet huma ta’ trasmissjoni lokali filwaqt li wieħed biss huwa relatat ma’ safar.
Il-kundizzjoni ta’ dawn is-7 każijiet ġodda huma kollha tajbin.
Il-każ relatat ma’ safar huwa ta’ Maltija ta’ 22 sena li hija relata ma’ persuna li marret btala l-Marokk. Il-familja ta’ din il-persuna tinsab fi kwarantina.
L-ewwel każ ta’ trażmissjoni lokali huwa ta’ Filippin ta’ 36 sena li beda bis-sintomi fil-25 ta’ Marzu. Dan kien mar ftit ix-xogħol u hemmek qed issir intraċċar tal-kuntatti li kellu.
Każ ieħor huwa ta’ Malti ta’ 48 sena u li beda bis-sintomi fil-aħħar ta’ Marzu. Dan ukoll mar għax-xogħol waqt li kellu s-sintomi. Fil-fatt wara li sar intraċċar tal-kuntatti, l-Awtoritajiet tas-Saħħa bagħtu d-dar 7 impjegati fuq kwarantina. Dan il-post ġie wkoll iffumigat.
It-tielet każ ta’ trażmissjoni lokali huwa ta’ Malti ta’ 27 sena u li beda bis-sintomi ta’ sogħla fit-30 ta’ Marzu. Huwa mar ix-xogħol meta kellu s-sintomi u b’hekk 4 impjegati ntbgħatu d-dar fuq kwarantina.
Mara ta’ 59 sena wkoll laqtet il-Coronavirus wara li kellha kuntatt ma’ qrabtha li wkoll kienu pożittivi għall-Coronavirus.
Il-ħames każ ta’ trażmissjoni lokali huwa ta’ Maltija ta’ 43 sena li bdiet bis-sintomi fit-18 ta’ Marzu. Hija ma taħdimx madankollu xorta qed isir kuntatt ma’ qrabatha.
L-aħħar każ huwa ta’ Maltija ta’ 26 sena li taħdem fil-qasam tas-saħħa. Hija bdiet bis-sintomi fit-28 ta’ Marzu.
Il-ġurnata ta’ qabel hija marret għax-xogħol u b’hekk sar kuntatt mal-impjegati kollha li kienu magħha fl-istess xift. Dawn kollha jinsabu taħt kwarantina. Il-pazjenti li setgħu kellhom kuntatt ma’ din il-persuna qegħdin taħt moniteraġġ.
Fuq mistoqsijiet li qed isiru mill-pubbliku dwar il-posta, is-Supretendent tas-Saħħa Pubblika saħqet dwar l-importanza tal-iġene regolari.
“In-nies jekk jirċievu posta minn barra minn Malta tajjeb li jekk din m’għandekx daqsekk bżonnha inti tħalliha ftit fil-ġenb għaliex nafu li jekk dan il-virus seta’ kien hemm kontaminazzjoni ġeneralment il-virus idum bejn 25 to 72 hours.”
Intant il-Professur Gauci spjegat li fit-taqsima tal-kura intensiva għad hemm żewġ pazjenti, bl-anzjan ta’ 72 sena li kien intubat qed jaqleb għall-aħjar.
“Bħala s-sitwazzjoni tal-każijiet li kellna, Għad għandna dawk iż-żewġ pazjenti li qegħdin l-ITU wieħed għadu qiegħed fuq il-ventilator però s-sitwazzjoni klinika tiegħu qegħda tmur għall-aħjar bil-mod il-mod u każ ieħor li għadu qiegħed moniterjat.”
Intant 10 persuni jinsabu fit-Taqsima tal-Mard Infettiv fl-Isptar Mater Dei, 16-il persuna qegħdin rikoverati fl-isptar privat St Thomas filwaqt li l-bqija ta’ dawk bil-Covid-19 qegħdin f’darhom taħt moniteraġġ.
