Pajjiżna għandu ħamsa u sittin perit ġdid. Dan hekk kif il-Ġimgħa waranofsinhar saret iċ-ċerimonja tal-warrant tal-periti fil-Mużew tal-Arkeoloġija.
Iċ-Chairman tal-Bord tal-Warrant tal-Periti, Frank Psaila qal li jemmen li dawn il-periti l-ġodda se jimxu u jaħdmu b’responsabilità.
Qal, “Din hija r-responsabilità kbira tagħna bħala bord, meta aħna nibagħtu għalihom għall-eżami tal-warrant, naturalment il-proċess ikun wieħed riġoruż ħafna. Nitolbuhom jippreżentaw il-proġetti li ħadmu fuqhom u jridu jgħaddu minn għarbiel li huwa diffiċli, imma hekk huwa meħtieġ, għaliex fl-aħħar mill-aħħar meta wieħed qed jagħti warrant lill-perit qed jagħtih responsabilità kbira.”
Il-Ministru responsabbli mill-Ippjanar, Stefan Zrinzo Azzopardi appella biex fiż-żmien meta din l-industrija qed tiżviluppa, huwa essenzjali biex dawn il-professjonisti jibqgħu ffukkati dwar il-futur tal-bini f’pajjiżna.
Il-Ministru Stefan Zrinzo Azzopardi qal li bħala Gvern, fil-jiem li ġejjin, se jkun qed iħabbar diversi riformi fis-settur tal-bini u l-kostruzzjoni biex kulħadd ikun mgħarraf bir-responsabilitajiet ta’ kull min hu involut f’dan is-settur.
Il-Ministru fisser ir-reponsabilitajiet tal-periti sa minn meta jiġi disinjat proġett sakemm jitlesta. Sostna li kull proġett għandu impatt fuq il-madwar u il-periti għandhom ikunu sensittivi ghal kull impatt.
Il-Ministru għall-Ippjanar qal li dan l-ippjanar ta’ bħalissa se jkun qed ifassal il-futur ta’ pajjiżna, bil-għan li pajjiżna jkun isbaħ.
Stqarr, “L-irwol tal-perit huwa wieħed ferm importanti fil-qasam tal-iżvilupp u l-kostruzzjoni, u l-għoti tal-warrant, ovvjament qed jagħti l-opportunità biex numru ta’ nies iggradwati jidħlu f’din il-professjoni. Hemm responsabbilitajiet illi wieħed irid jerfa’ meta wieħed ikollu dan il-warrant u anki fi żmien meta l-Gvern qiegħed iħabbar anki miżuri illi permezz tagħhom se nirregolaw aktar dan is-settur importanti f’pajjiżna.”
Preżenti wkoll kien hemm il-President tal-Kamra tal-Periti, Andrè Pizzuto.
