Wara li temmew b’suċċess kors intensiv ta’ taħriġ t’għoxrin ġimgħa, 64 rekluta ssieħbu fid-Dipartiment tal-Protezzjoni Ċivili u b’hekk dan id-dipartiment issa għandu total ta’ kważi 300 uffiċjal.
B’rabta ma’ dan, fl-istazzjon tal-Protezzjoni ċivili, f’Ħal Far, saret ċerimonja fejn fi tmiemha r-rekluti ngħataw il-ġurament tal-ħatra bil-qofol tal-istess ċerimonja kien il-passing out parade tar-rekluti.
Waqt din iċ-ċerimonja, il-Ministru għall-Intern, is-Sigurtà u x-Xogħol Byron Camilleri indirizza lir-rekluti u sostna kif dawn il-ħaddiema se jingħaqdu f’Dipartiment li huwa mgħammar bl-għodda kollha meħtieġa għal ħidmiet ta’ salvataġġ u ta’ protezzjoni ċivili, frott l-investiment kontinwu li sar mill-Gvern.
“Kelli ċ-ċans li nitkellem magħhom u nindirizzhom. Spegajtilhom kif deħlin fil-protezzjoni ċivili li ma tintgħarafx minn ftit tas-snin ilu ‘l hawn, bi drittijiet aħjar, b’kundizzjonijiet aħjar iżda wkoll b’inġenji, b’għodda u taħriġ li jagħmilhom f’pożizzjoni li jistgħu jagħtu l-aqwa għajnuna lil ħaddieħor”
Byron Camilleri – Ministru
Il-Ministru spjega wkoll kif għall-ewwel darba fl-istorja, pensjonanti li servew f’korp dixxiplinarju u li ma kinux jieħdu żieda tal-għoli tal-ħajja, issa se jingħataw bonus addizzjonali daqs iż-żieda sħiħa li tingħata għall-għoli tal-ħajja.
Id-Direttur Ġenerali Peter Paul Coleiro u r-rekluta Melanie Callus ukoll indirizzaw lir-rekluti għaċ-ċerimonja tal-passing out parade.
Fil-fatt Coleiro spjega x’se kjun qed jiġri minn dawn il-membri ġodda issa li huma membri sħaħ tad-Dipartiment tal-Protezzjoni Ċivili.
B’dan l-intake is-CPD se tissaħħaħ b’64 membru ġdid u dawn il-pumpiera se jkunu qed jinqasmu fl-istazzjonijiet biex isalvaw u jipproteġu aħjar lill-poplu malti u Għawdxi.
Peter Paul Coleiro – Direttur Ġenerali tas-CPD
Minn naħa tiegħu Colin Vella, spjegalna xi tfisser għalih li jkun uffiċjal tas-CPD.
“Jien għalija tfisser imħabba u dedikazzjoni lejn il-poplu Malti u kif ukoll Għawdxi u ovjament anke jekk tiġi msejjaħ biex isservi barra mill-pajjiż.”
Colin Vella – Assistant Rescue Officer
