60 sena ilu sejħilha l-Mulej.
Kien bħal llum nhar l-Għid tal-Assunta, il-15 ta’ Awwissu tal-1963. Dakinhar Frances Mifsud tat ħajjitha lil Alla bħala soru tal-klawsura fil-kongregazzjoni tal-Agostinjani.
‘Il bogħod mid-dinja mgħaġġla ta’ barra t-triq, kif irfisna l-għatba tal-Monasteru fi Triq ir-Repubblika l-Belt Valletta, ħassejna sens ta’ paċi u ferħ intern. Laqgħatna bi tbissima ħelwa minn wara l-grada, b’merħba sabiħa.
Dawritna mal-kappella ddedikata lill-Presentazzjoni tal-Madonna li tiċċelebra il-Festa ta’ Santa Katarina ta’ Lixandra li tinsab biswit il-Monasteru stess.
Qasmet magħna il-ħsibijiet tagħha ta’ fuq meta ħasset is-sejħa għall-vokazzjoni għall-Mulej.
Qalet, “Kelli 17-il sena meta ħassejt il-vokazzjoni. Kont devota ta’ Santa Rita, dejjem xtaqt nidħol ma’ ta’ Santa Rita. Għalkemm kont ħsibthom dawk li huma ta’ Santa Monika. Kont inżilt ninvista lil Santa Rita, kien hemm il-Kappillan qed iqarar u xħin għedtlu li rrid nidħol ma’ ta’ Santa Rita, qalli le għax dawk tal-Klawsura, ma joħorġu xejn. Għedtlu magħhom mela nidħol… f’sekonda qrajtha.”
Kelmitna fuq il-familja kbira li ħalliet warajha.
Stqarret, “Konnha familja kbira ta’ 13, ommi u missieri 15, ħallejt lil ħija iżgħar ta’ sentejn u nofs. Però qatt ma ħassejt xi ħaġa għax ħallejt lil ħuti u l-familja tiegħi, għax kieku kelli niżżewweġ, kont inħallihom xorta. Dejjem kont kuntenta.”
B’nostalġija, Madre Badessa, Sister Michelina rrakkuntat ma’ One News li meta daħlet l-ewwel darba fil-kunvent, kien hemm 36 soru. Illum fil-monasteru qegħdin biss tliet sorijiet, il-Vigarja Sister Antoniette ta’ 80 sena, Sister Assunta ta’ 86 sena u hi ta’ 78 sena.
Qaltilna li ma jiddispaċihiex li wieġbet għas-sejħa t’Alla.
Filwaqt li urietna ritratt tagħha waqt in-novizatt, Sister Michelina rrakkuntat magħna kif kienet il-ħajja monastika 60 sena ilu u l-bidla li rat iseħħ matul is-snin.
Qalet, “Issa jien ilni sittin sena hawn u ħamsin sena minnhom kienu għalija klawsura perpetwa. Ma konnha niċċaqilqu mkien, la l-bieb ta’ barra ma konnha naraw,xejn. Jekk bżonn ta’ dentist, tabib jiġu hawnhekk. Ġieli anki operazzjonijiet saru hawn. Però mbagħad inbidlet il-Kostituzzjoni skont il-Konċilju u tawna l-fakultajiet li nistgħu noħorġu. Jekk m’għandniex min jaqdina, noħorġu nixtru. Mhux ħa ngħidu mmorru passiġata. Noħorġu għall-bżonn.”
Qaltilna aktar dwar kif kien isir dak iż-żmien il-kuntatt ma’ barra.
Qalet, “Aħna kellna s-sagristana. Kellna qanpiena minn għandha għal għandna. Jekk jiġi konfessur biex iqarar, inċemplulha u tiftaħlu hi. Jekk jiġi tabib inċemplulha u tiftaħlu hi. Jiġifieri aħna qatt ma kien ikollna kuntatti diretta mal-bieb ta’ barra.”
Tlabniha tgħidilna jekk qatt’x kellha xi mħabba f’ħajjitha. Qaltilna li kellha ġuvni imma li qatt ma kellha ġibda għaż-żwieġ.
Għalkemm tinsab fil-Klawsura, qaltilna li jsegwu u jinteressaha dak li jseħħ madwar id-dinja. Jinteressawha n-nies u l-ħtiġijiet tagħhom ta’ kuljum.
Kompliet iddawarna mal-monasteru. Daħlitna fejn dari kienu jaħmu l-ħobż. Irrakuntatilna wkoll dak li għamlet lil ta’ fuqha, lill-Madre Superjura, ftit jiem biss wara li daħlet għall-ħajja monastika, 60 sena ilu.
Stqarret, “Konnha nkunu hawnhekk rikrejazzjoni, kien ikun mimli hawn fuq. U qaltilna dawn min huma li qed tgħidu fuqhom. Għedtilha dawk beati. Qaltli imma aħna ma ngħiduhomx fil-matijoloġu. Għedtilha dawk issa saru beati. U marret tgħid lill-Kappillan, Qatlu dawn x’inhuma qed issemmu dawn il-Beati. Qallha dawk artisti, mela beati.
Staqsejniha għal min kienet qed tirreferi bħala beati.
Tenniet, “Elvis, Pat Boone. Imbagħad ġie jgħajjatli. Qalli x’int tgħidilhom Frans, kont għadni kif dħalt hawn jien, għedtlu imma mhux tmur tgħidilha li huma artista. Qalli imma x’ridtni li ngħidilhom.”
