Godwin Debattista se jagħlaq 60 sena f’Ottubru. Għal ħafna nies, dan it-tragward jiġi ċċelebrat b’xi festin jew ħarġa.
Iżda ‘Goddo’, kif inhu magħruf fost sħabu, li huwa minn Malta iżda ilu jgħix fir-Renju Unit mill-2015, iddeċieda li jiċċelebra b’differenza.
Huwa qed jorganizza żewġ mixjiet ta’ 60 mil kull wieħed: mil għal kull sena ta’ ħajtu. Bejn is-26 u s-27 ta’ Awwissu se jimxi minn Bedford għal Hyde Park, f’Londra, b’risq it-tfal fir-Renju Unit li għandhom il-marda tal-kanċer. Bejn is-7 u t-8 ta’ Ottubru, se jorganizza mixja oħra b’risq il-Fondazzjoni Sebħ, li tgħin tfal bla saqaf fuq rashom ġewwa pajjiżna.
Din mhux l-ewwel darba li għamel dawn it-tip ta’ inizjattivi, hekk kif il-passat organizza kunċerti bl-isem ‘Heart of Gold’, b’risq ir-Razzett tal-Ħbiberija, flimkien ma’ diversi mixjiet oħra b’risq Puttinu Cares u Anna Kennedy Charity fost oħrajn.
Biex tgħin lil Godwin Debattista, żur dan is-sit.
