Sitt DJs Maltin se jkun qed jagħtu prestazzjoni unika f’wieħed mill-akbar klabbs fil-qalba ta’ Londra.
Id-DJs – Pocci, Panelli, Ziggy, Carl Lautier, Nikki VP u Nick C se jkunu qegħdin iħallu xtutna biex idoqq ġewwa Raffles, klabb popolari għall-ispettakli ta’ mużika indimentikabbli li joffri.
Fil-fatt, dan il-klabb ra firxa impressjonanti ta’ DJs u mużiċisti ta’ fama mondjali jdoqqu fih, fosthom David Guetta, Carl Cox u Jason Derulo.
L-avveniment se jsir il-Ġimgħa 12 ta’ Jannar, u għalih se jattendu ukoll diversi Maltin li mhux biss jgħixu ġewwa Londra, iżda wkoll Maltin li se jivvjaġġaw għal dan l-appuntament speċjali.
Ftit jiem qabel jaqbdu t-titjira lejn Londra, dan l-istazzjon tkellem ma’ Pocci, wieħed mid-Djs li se jkun qed idoqq f’Raffles, fejn spjega kif ġiet din l-opportunità unika, biex hu u sħabu jagħmlu isem lil pajjiżna f’dan il-klabb popolari.
“Fil-verità bla ħsieb. Iltqajna ma’ xi ħadd konnha ġo klabb Malta, kellhu xi kuntatt ma’ dan il-klabb Raffles u tana opportunità li nagħmlu party hemmhekk, norganizzaw l-event u tellajna DJs minn Malta. Qegħdin xi ħames DJ’s u qed jitilgħu ħafna nies li ġejjin minn Malta biex jattendu dan l-event.”
Ma’ dan l-istazzjon spjegaw li kull darba li jitilgħu fuq il-palk, ix-xewqa tagħhom hija li mhux biss jagħtu lil min ikun quddiemhom spettaklu uniku, iżda li joħolqu memorja indimentikabbli għal kull min ikun preżenti.
Ziggy spjega kif tul is-snin, huwa ra diversi bidliet fix-xena tad-divertiment lokali, hekk kif diversi avvenimenti qed jittellgħu b’mod ferm aktar professjonali.
“F’dan l-aħħar żmien ix-xena evolviet ħafna iktar, mhux just biss parties lokali però għadna ħafna nies li qed jinvestu f’ħafna festivals barranin. Naħseb li anke qed jgħina fit-turiżmu ukoll tal-pajjiż għax jiġu ħafna nies minn barra li ma jew ma jkunu qatt ġew Malta eżempju jiġu l-ewwel darba imbgħad jerġgħu jiġu biex jaraw il-pajjiż just partying.”
Panelli qal li hu, flimkien ma’ sħabu jinsabu ħerqana biex jagħtu l-aqwa prestazzjoni quddiem din il-folla numeruża.
“Ħerqana u eċitati ħafna. Ilna naħdmu ħafna għal din l-okkażjoni. Nixtiequ nirringrazzjaw lit-tim u lil kull min tagħna l-għajnuna u lit-tim li għadna warajna u looking forward anke għal futur biex ikollna iktar opportunità biex indoqqu barra minn Malta u anke nġibu forsi nies li jdoqqu hawn Malta wkoll.”
B’dan l-avveniment, il-karriera ta’ dawn id-DJs żgur mhux forsi se tkompli tikber, fejn bħalissa huma impenjati b’diversi avvenimenti, fejn kull ġimgħa jagħtu spettakklu lil kull min jismgħahom idoqqu.
