Sal-aħħar ta’ Diċembru li għadda, f’pajjiżna kien hawn 586 tifel u tifla bi bżonn ta’ ħarsien alternattiv minn dak tal-ġenituri “naturali” tagħhom.
222 minnhom qed jiġu fostered minn persuni li mhumhiex qrabathom, mija u sittax fostered ma’ qrabathom u 248 fi djar tat-tfal.
Fil-Konferenza Nazzjonali dwar il-Fostering, il-Prim Ministru Joseph Muscat qal li dan huwa suġġett emozzjonali ħafna, fejn sfortunatament, għal raġunijiet diversi bħall-mard u l-vizzji, tittieħed id-deċiżjoni diffiċli iżda fl-aħjar interess tat-tfal, li dawn joqogħdu għal perjodu jew ġieli anki għal dejjem, ’il bogħod mill-familja “naturali” tagħhom.
F’dik li sejjaħ bħala “missjoni”, il-Prim Ministru qal li f’pajjiżna hawn 217-il foster carer li bejniethom jiffosterjaw 247 tifel u tifla.
Fakkar li foster carer irid ikun magħżul, kwalifikat, approvat u sorveljat.
Filwaqt li saħaq li kull storja hija differenti, il-Prim Ministru qal li l-Gvern ħaseb f’liġi biex tindirizza b’mod ekwu u kemm jista’ jkun bilanċjat, dawn is-sitwazzjonijiet.
Hawnhekk innota li wara żewġ konsultazzjonijiet pubbliċi, tfal fil-fostering se jkunu jistgħu jiġu adottati wara perjodu ta’ 3 jew 5 snin.
Fakkar kif mal-foster care hemm marbuta spejjeż kbar, u għalhekk il-Gvern żied l-allowance għal kull wild minn €70 għal €100 fil-ġimgħa, fejn investa aktar minn €1,200,000.
Minbarra din il-miżura, dawn il-familji jkunu mgħejjuna b’miżuri oħra fosthom tilqim b’xejn, safar b’xejn għaż-żewġ ġenituri li jkollhom isiefru għall-kura barra minn Malta, u trasport b’xejn lejn l-iskola.
Semma wkoll il-miżura ta’ €10,000 lil ġenituri li jadottaw, u qal li din is-sena, aktar minn €260,000 ingħataw lil 27 ġenitur adottiv li ġabu tfal minn barra mill-pajjiż.
Filwaqt li tenna li l-baġit li ġej se jkompli jgħin lil min jiflaħ l-inqas, il-Prim Ministru kellu appell ċar: biex ħadd ma jibża’ jirrapporta każijiet ta’ abbuż.
B’mod mill-aktar skjett qal li kulħadd għandu jirrapporta l-abbużi, u kien għalhekk li l-liġi ġiet emendata biex timponi l-obbligu li dawn ir-rapporti jsiru minn nies li jkollhom kuntatt dirett mat-tfal u jindunaw b’dawn iċ-ċirkostanzi.
Dan l-impenn tennieh ukoll il-Ministru tal-Familja u Solidarjetà Soċjali, Michael Falzon.
Il-Ministru għas-Solidarjetà Soċjali, sostna li “Nemmnu bis-serjetà li għandna nimbuttaw iktar il-fostering biex jekk Alla jrid u jekk jista’ jkun, it-tfal li jkunu out of care, iktar ma jkunu fil-foster care iktar aħjar. L-impenn tagħna qiegħed hemm u se jibqa’ hemm anki fil-futur.”
Min-naħa tiegħu, il-Kap Eżekuttiv tal-Fondazzjoni għas-Servizzi tal-Ħarsien Soċjali, Alfred Grixti, innota li bħala riżultat ta’ dawn il-miżuri u d-diversi kampanji li jsiru, in-numru ta’ nies interessati fil-fostering żdied bi kważi 80%: minn 74 fl-2017, għal 133 fl-2018.
Bl-istess mod, in-numru ta’ tfal li ġew fostered tul l-istess perjodu żdied bi 28%.
