Alexandra Pace, Sunday Eboh, Collins Eguavoen, Marvis Iyeke u Tony Ogbonna baqgħu jinżammu arrestati wara li ttellgħu l-Qorti tard it-Tnejn filgħaxija mixlija b’ħasil ta’ flus.
Il-Maltija u l-erba’ Niġerjani wieġbu mhux ħatja għall-akkużi miġjuba kontrihom li jinkludu l-konverżjoni ta’ propjetà li b’xi mod inkisbet minn attività kriminali, li akkwistaw propjetà li oriġinat minn attività kriminali u li laqgħu fi ħdanhom affarijiet misruqa fost oħrajn.
Pace waħedha kien akkużata wkoll li għamlet dikjarazzjoni falza u li saret riċediva filwaqt li Eguavoen waħdu kien mixli wkoll li kiser kundizzjonijiet marbuta ma’ ħelsien mill-arrest.
Fil-każ ta’ Tony Ogbonna, ġie kkontestat il-validità tal-arrest hekk kif l-avukat difensur stqarr li jidher li hemm verżjoni waħda li l-pulizija qed joqogħdu fuqha.
Fil-Qorti ġie rrakkontat kif ftit xhur ilu l-pulizija rċivew rapport mingħand il-vittma fejn qalet li sofriet minn reat li wassal għal numru ta’ transazzjonijiet li jammontaw ‘l fuq minn €58,000 bil-konsegwenza li l-vittma spiċċat b’xejn.
Il-vittma qalet li rċeviet friend request online mingħand raġel u bdew jitkellmu u kkonvinċiha li kienet se tirċievi rigal li bagħtilha minn barra minn Malta.
Qalilha wkoll biex tagħmel diversi transazzjonijiet f’madwar sitt kontijiet bankarji, liema kontijiet iwasslu għall-akkużati.
Ġie spjegat li kien hemm sitt timijiet li lbieraħ arrestaw lill-imputati u fejn seħħew numru ta’ tfittxijiet.
Partikolarment fil-każ ta’ Tony Ogbonna, il-pulizija spjegaw li arrestawh wara li kellmu persuna terza, liema persuna ma ttellgħetx il-Qorti.
Intqal li Ogbonna ma jidher imkien fit-transazzjonijiet iżda l-prosekuzzjoni nsistiet li Ogbonna jaf ikun il-moħħ wara din l-operazzjoni sħiħa iżda l-investigazzjonijiet għadhom għaddejjin.
Il-prosekuzzjoni opponiet għat-talbiet ta’ ħelsien mill-arrest minħabba biża’ ta’ intralċ ta’ provi apparti li l-allegat vittma hija persuna vulnerabbli filwaqt li r-reat fih innifsu huwa wieħed gravi.
Il-Qorti ppreseduta mill-Maġistrat Doreen Clarke ċaħdet it-talba għall-ħelsien mill-arrest.
Intant fi stqarrija li ntbagħtet mill-pulizija ngħad li l-vittma kienet f’relazzjoni virtwali ma’ persuna li qal li huwa suldat Amerikan li qiegħed fuq missjoni fl-Afganistan, iżda kien se jtemm din il-missjoni u jiġi jgħix Malta.
Qabel tressqu l-Qorti l-pulizija qalet li dan il-każ huwa meqjus bħala l-ewwel wieħed li fih tressqu persuni l-Qorti fuq allegat frodi permezz ta’ relazzjoni virtwali magħrufa aħjar bħala romance fraud.
Il-pulizija qed timxi mat-teżi li l-imputati kienu bħala intermedjarji f’dan il-każ.
