Malta Public Transport ġarret 49.6 miljun passiġġier fl-2022, li tfisser żieda ta’ 40% meta mqabbla mal-2021. F’Diċembru 2022, in-numru ta’ passiġġieri li jivvjaġġaw bil-karozza tal-linja qabeż iċ-ċifri ta’ qabel il-pandemija għall-ewwel darba.
“Ninsabu kuntenti li lħaqna dan it-tragward sinifikanti meta qbiżna n-numri rekord tagħna tal-2019 għall-ewwel darba f’Diċembru,” qal Konrad Pulé, General Manager ta’ Malta Public Transport. “It-tkabbir kostanti fin-numri matul l-aħħar xhur huwa inkoraġġanti ħafna u huwa sinjal ċar li l-kunfidenza u d-domanda għat-trasport pubbliku qed jerġgħu jiżdiedu.”
Mit-tnedija tal-inizjattiva tat-trasport pubbliku b’xejn f’Ottubru, kien hemm kważi 50% aktar passiġġieri tat-tallinja card meta mqabbla mal-istess perjodu fl-2021. Dan huwa wkoll 8% aktar mill-2019 li kienet sena record. Dan ifisser li l-inizjattiva tat-trasport pubbliku b’xejn qed tirnexxi tinċentiva saħansitra aktar nies biex jagħmlu użu mit-trasport pubbliku.
Din it-tendenza kienet riflessa wkoll lejlet l-Ewwel tas-Sena, meta l-kumpanija ġarret id-doppju tal-ammont ta’ nies fuq is-servizzi tagħha bil-lejl meta mqabbla mal-2019. Is-servizzi ta’ bil-lejl, flimkien mar-rotot ta’ bi nhar u servizzi speċjali, huma inklużi wkoll fl-iskema tat-trasport pubbliku b’xejn għad-detenturi kollha ta’ tallinja card.
“Nixtiequ nirringrazzjaw lill-passiġġieri kollha tagħna, li qed jagħżlu li jivvjaġġaw b’mod sostenibbli. Nixtiequ wkoll nirringrazzjaw lill-impjegati kollha tagħna peress li dan is-suċċess ma kienx ikun possibbli mingħajr id-dedikazzjoni u l-impenn tagħhom matul is-sena”, spjega s-sur Pulé. “Dawn ir-riżultati jħeġġuna nkomplu naħdmu qatigħ biex intejbu s-servizz tal-karozzi tal-linja tagħna. Ġbarna feedback estensiv permezz ta’ riċerka tal-klijenti, u bħalissa qed niddiskutu diversi titjib fin-netwerk tar-rotot ma’ stakeholders differenti f’dan ir-rigward.”
Malta Public Transport qed tinvesti f’25 karozza tal-linja elettrika ġdida oħra li se jiddaħħlu fis-servizz fil-ġimgħat li ġejjin sabiex jiżdiedu l-frekwenzi tas-servizzi tal-karozzi tal-linja.
