Nhar is-Sibt li ġej, b’investiment ta’ €8.2 miljun, madwar 4,800 persuna se jkunu qed jingħataw pagament għal inġustizzji jew anomaliji li sofrew fl-impjieg tagħhom qabel Marzu tal-2013.
Dan tħabbar mill-Ministru għall-Politika Soċjali, Michael Falzon, f’konferenza tal-aħbarijiet bit-tema ‘Malta Ġusta’, fejn fiha ħabbar ukoll li bil-pagamenti imħabbrin issa, il-Ministeru se jkun għalaq għal kollox l-implimentazzjoni tal-miżuri soċjali kollha li kienu fdati f’idejh fil-Baġit għal din is-sena.
Dawk eliġibbli għal dan għas-seba’ pagament minn Gvern Laburista huma l-eks membri tal-korpi mwaqqfa qabel l-1979 u oħrajn li wara daħlu jaħdmu fis-Servizz Pubbliku jew fis-Settur pubbliku; l-eks mpjegati tal-Gas Board, li kienu trasferiti mal-Korporazzjoni Enemalta; u għall-ewwel darba din is-sena ħaddiema, li kienu daħlu mal-Korporazzjoni Telemalta bejn Jannar tal-1978 u Jannar tal-1979, iżda naqsu li jikkwalifikaw għall-pensjoni tas-servizz.
Bejn wieħed u ieħor, fl-aħħar seba’ snin kien hemm medja ta’ 3,000 persuna jew l-eredi tagħhom li kull sena bbenefikaw mill-għotjiet li tħallsu skont is-snin ta’ servizz li saru fis-Servizz Pubbliku.
B’kollox se jkunu tħallsu aktar minn €42.7 miljun.
Il-Ministru Falzon spjega kif bl-għeluq tal-iskema tas-Servizz Pubbliku, b’kollox ingħalqu erba’ skemi mibdija fl-2017, li kienu jinkludu dawk għall-membri tal-Korp tal-Pulizija, għall-eks ħaddiema tal-Malta Electricity Board u dawk tax-Xatt.
Qal, “Is-Sibt li ġej inkunu għalaqna l-akbar bulk ta’ pagamenti li kien hemm, imma hemm skemi oħrajn li jkunu għadhom miftuħin. Dan hu Gvern li jżomm kelmtu u dan hu Ministeru li, għas-sitt darba konsekuttiva, wettaq il-miżuri kollha tal-baġit li kienu assenjati lilu.”
Sadanittant, kif tħabbar fid-diskors tal-Baġit fl-aħħar ġimgħat, ġew ivvotati fondi biex fl-2024 tiġġedded l-iskema tas-Settur Pubbliku u biex jingħata kumpens finanzjarju lil madwar 500 persuna li kienu sofrew telf fid-dħul tagħhom wara li, b’mod arbitrarju, tneħħew minn għadd ta’ entitajiet, inkluż t-tarznari, qabel Marzu 2013.
