Fil-Lusail Stadium, reġa kellna logħba oħra li ntemmet fi dro u ntemmet bl-għoti tal-penalties.
L-Arġentini marru fil-vantaġġ fil-35 minuta, meta Messi għadda tajjeb f’nofs il-grawnd u ta kross preċiż lejn Molina li qabeż lil Blind u għeleb għal kollox lill-gowlkiper Olandiż Noppert.
Fil-71 minuta, Acuna pprova jaqbeż lil Dumfries f’tarf il-kaxxa u twaqqa, sabiex ir-referi ordna l-penalty. Mill-11-il metru, Messi ma falliex u għamilhom 2-0. B’dan il-gowl, Messi laħaq lil Gabriel Battistuta, bħala l-aktar plejer li skorja għall-Arġentina fit-Tazza tad-Dinja.
Madanakollu l-Olandiżi ma remewx ix-xugaman. Fit-83 minuta huma naqsu l-iskor permezz ta’ Weghorst li rċieva tajjeb u b’daqqa ta’ ras tefa’ l-ballun fir-rokna tax-xibka.
Lejn l-aħħar ħinijiet, l-Olandiżi saħansitra skorjaw il-gowl tad-dro u għal darb’oħra kien Weghorst. Ta’ min jgħid li b’dan il-gowl, Weghorst sar l-ewwel plejer sostitut għall-Olanda li skorja darbtejn fit-Tazza tad-Dinja.
Għal darb’oħra għal-lum, iż-żewġ timijiet kellhom imorru għall-ħin barrani.
Fil-114-il minuta, dak li deher li kien se jkun il-gowl tar-rebħa għall-Arġentina, mix-xutt ta’ Lautaro Martinez il-ballun ġie devjat f’corner minn Van Dijk. Erba’ minuti wara, reġa’ kien Martinez, li din id-darba ġie mċaħħad minn Noppert.
Fl-aħħar minuta tal-ħin barrani, Fernandez ra l-ballun jaħbat ma’ sieq il-lasta.
Ir-rebbieħ b’hekk kellu jiġi deċiż ukoll bl-għoti tal-penalties.
Van Dijk inkariga mill-ewwel penalty Olandiż u ra lill-gowlkiper Martinez isalva tajjeb.
Għall-Arġentina, Messi elegantament tefa’ l-ballun fix-xibka.
Martinez salva ferm tajjeb it-tieni penalty mogħti minn Berghuis.
Paredez poġġa lill-Arġentini sieq waħda fis-semifinali, meta ma falliex mill-11-il metru.
Koopmeiners skorja l-ewwel penalty Olandiż.
Montiel skorja wkoll għall-Arġentina.
Weghorst reġa’ għeleb lil Martinez u skorja t-tieni penalty Olandiż.
Enzo Fernandez tefa’ inkredibilment barra.
De Jong skorja l-penalty li kien imiss għall-Olanda.
Lautaro Martinez skorja l-penalty deċiżiv u ħa lill-Arġentina fis-semifinali.
Ritratt: Getty Images
