B’referenza għal stqarrija għall-istampa maħruġa nhar il-Ġimgħa, 20 ta’ Ottubru 2017 fejn ingħatat informazzjoni dwar is-sottoskrizzjonijiet f’għeluq it-tieni ħruġ tat-62+ Savings Bond tal-Gvern ta’ Malta (ħruġ ta’ Ottubru 2017), l-Accountant General fi stqarrija ħabbar il-policy tal-allokazzjoni fir-rigward ta’ dan il-ħruġ.
It-Teżor irċieva (i) 3,974 applikazzjoni għall-ammont nominali ta’ €31,194,800 mingħand applikanti ġodda (Kat. A) u (ii) 8,954 applikazzjoni għall-ammont nominali ta’ €33,115,800 mingħand applikanti li kienu applikaw fil-ħruġ ta’ Settembru, 2017 u li l-applikazzjoni tagħhom ma ġietx aċċettata sħiħa (Kat. B). L-applikazzjonijiet kollha li ġew sottometti miż-żewġ kategoriji ta’ applikanti ammontaw għall-ammont totali ta’ €64,310,600.
L-allokazzjoni fit-62+ Savings Bond tal-Gvern ta’ Malta (Ottubru 2017) se tkun kif ġej:
L-ewwel stadju tal-allokazzjoni – l-ewwel element
Kif stipulat fl-artikolu 10 (a) u (b) tal-prospett ippubblikat fit-3 ta’ Ottubru 2017, l-applikanti l-ġodda se jiġu soġġetti għall-istess allocation policy applikata għall-applikanti tal-ewwel ħruġ tat-62+ Savings Bond tal-Gvern ta’ Malta ta’ Settembru 2017. F’dan ir-rigward,
- sottoskrizzjonijiet mingħand applikanti ġodda għal ammonti sa €5,000 se jiġu milqugħin kollha;
(2) sottoskrizzjonijiet mingħand applikanti ġodda għal ammonti ’l fuq minn €5,000 se jiġu allokati minimu ta’ €5,000 kull applikant flimkien ma’ ammont addizzjonali ta’ 22% fuq il-bilanċ li ma ġiex allokat, aġġustat ’il fuq għall-eqreb €100.
F’dan ir-rigward, wara l-implimentazzjoni tal-ewwel stadju tal-allokazzjoni, it-Teżor ikun qed jalloka s-somma ta’ €21,644,100 mill-ammont tal-ħruġ ta’ €30,000,000.
It-tieni stadju tal-allokazzjoni – it-tieni element
Wara l-implimentazzjoni tal-ewwel stadju tal-policy tal-allokazzjoni, l-ammont ta’ €8,355,900 li baqa’ x’jiġi allokat se jkun allokat skont it-termini tal-artikolu 10 (d) tal-prospett. L-applikanti kollha tal-ħruġ ta’ Ottubru 2017 (Kat. A u Kat. B) li l-applikazzjoni tagħhom ma ġietx aċċettata sħiħa kemm fil-ħruġ ta’ Settembru kif ukoll f’dak ta’ Ottubru, se jiġi allokat ammont addizzjonali skont din il-policy tal-allokazzjoni:
- Applikanti ta’ Kategorija A (applikanti ġodda):
- l-ammonti mhux allokati sa €600 ta’ kull applikant se jiġu milqugħin kollha; u
- l-ammonti mhux allokati ’l fuq minn €600 jirċievu minimu ta’ €600 kull applikant, flimkien ma’ ammont addizzjonali ta’ 3% fuq il-bilanċ li ma ġiex allokat lilhom, aġġustat ’l fuq għall-eqreb €100.
- Applikanti ta’ Kategorija B (l-applikanti li applikaw fil-ħruġ ta’ Settembru 2017 u li l-applikazzjoni tagħhom ma ġietx aċċettata kollha u reġgħu applikaw mill-ġdid bil-bilanċ sħiħ mhux allokat lilhom fil-ħruġ ta’ Ottubru 2017):
- l-applikanti li reġgħu applikaw b’ammont sa €600 se jiġu milqugħin kollha; u
(b) l-applikanti li reġgħu applikaw b’ammonti ’l fuq minn €600 se jiġu allokati minimu ta’ €600 kull applikant flimkien ma’ ammont addizzjonali ta’ 3% li ma ġiex allokat lilhom, aġġustat ’il fuq għall-eqreb €100.
Permezz tat-tieni element tal-policy tal-allokazzjoni, it-Teżor qed jalloka s-somma ta’ €8,099,800, li minnhom €1,873,100 ġew allokati lill-applikanti ta’ Kat. A (applikanti ġodda) u €6,226,700 lill-applikanti ta’ Kat. B.
Wara l-implimentazzjoni taż-żewġ elementi flimkien tal-policy tal-allokazzjoni, it-Teżor qed jalloka s-somma ta’ €29,743,900 mis-somma offruta ta’ €30,000,000.
It-tabella 1.0 ta’ hawn taħt tagħti xi eżempji dwar x’se jiġi allokat mill-ammont sottoskritt.
| € | € | € | € | € | € | € | € | € | € | |
| Ammont sottoskritt fil-ħruġ ta’ Settembru u Ottubru 2017 | 10,000 | 9,000 | 8,000 | 7,000 | 6,000 | 5,000 | 4,000 | 3,000 | 2,000 | 1,000 |
| Ammont allokat(i) lill-applikanti tal-ħruġ ta’ Settembru u (ii) applikanti l-ġodda tal-ħruġ ta’ Ottubru qabel l-implimentazzjoni tat-tieni element tal-policy tal-allokazzjoni ta’ Ottubru 2017 | 6,100 | 5,900 | 5,700 | 5,500 | 5,300 | 5,000 | 4,000 | 3,000 | 2,000 | 1,000 |
| Ammont allokat permezz tat-tieni element tal-policy tal-allokazzjoni (ħruġ ta’ Ottubru 2017) | 700 | 700 | 700 | 700 | 700 | – | – | – | – | – |
| L-ammont totali allokat | 6,800 | 6,600 | 6,400 | 6,200 | 6,000 | 5,000 | 4,000 | 3,000 | 2,000 | 1,000 |
Kif stipulat fil-prospett, l-imgħax fuq l-ammont investit fit-62+ Savings Bond tal-Gvern ta’ Malta (ħruġ ta’ Ottubru 2017) beda jakkumula mill-20 ta’ Ottubru 2017. Aktar informazzjoni tista’ tinkiseb mir-riżultat tal-ħruġ tat-62+ Savings Bond tal-Gvern ta’ Malta ppubblikat fuq is-sit elettroniku tad-Dipartiment tat-Teżor www.treasury.gov.mt.
Rifużjonijiet
Rifużjonijiet li jammontaw għas-somma ta’ €4,090,100 lill-applikanti tal-ewwel ħruġ ta’ Settembru 2017 li l-applikazzjoni tagħhom ma ġietx aċċettata kollha u li ma pparteċipawx fit-tieni ħruġ ta’ Ottubru 2017 se jitħallsu l-Ġimgħa 27 ta’ Ottubru 2017 permezz ta’ kreditu bankarju taħt l-iskema Single Euro Payments Area(SEPA) fl-International Bank Account Number (IBAN) kif hemm indikat mill-applikant fil-formola tal-applikazzjoni.
Hu ppjanat li r-rifużjonijiet li jammontaw għas-somma ta’ € 34,566,700 fi flus mhux allokati lill-applikanti (Kat. A u Kat. B) tal-ħruġ ta’ Ottubru 2017 u li l-applikazzjoni tagħhom ma ġietx aċċettata kollha se jitħallsu permezz ta’ kreditu bankarju taħt l-iskema SEPA fl-IBAN kif indikat mill-applikant fil-formola tal-applikazzjoni nhar l-Erbgħa, l-1 ta’ Novembru 2017.
