Fl-aħħar sigħat, feġġew tmienja u tletin każ ieħor ta’ coronavirus f’pajjiżna minn fost rekord ta’ elf u tmintax-il test, biex it-total ta’ persuni nfettati f’Malta tela’ għal tliet mija u sebgħa u tletin.
Is-Supretendent tas-Saħħa Pubblika, il-Professur Charmaine Gauci, qalet li ħamsa u għoxrin persuna mill-każijiet il-ġodda huma nisa – fosthom tifla u żewġ nisa tqal. It-tlettax l-oħra huma rġiel, fosthom tifel.
Meta tat id-dettalji, il-Professur Gauci spjegat li hemm Malti ta’ wieħed u tletin sena li jaħdem fl-istabbiliment tal-ikel Piscopo Wine and Spirits f’Raħal Ġdid. Appellat li jekk hemm xi ħadd li mar jixtri minn dan l-istabbiliment mis-sitta ta’ April sal-lum, u jiżviluppa xi sintomi, għandu jċempel fuq il-helpline 111. Fakkret iżda li l-klijenti ma jkollhomx kuntatt twil u r-riskju li jieħdu l-virus huwa minimu.
Fost il-każijiet il-ġodda hemm Malti ta’ dsatax-il sena li jaħdem l-ISCAN.
Fiż-żewġ ħwienet rispettivi qed issir il-fumigazzjoni u qed jittieħdu l-prekawzjonijiet meħtieġa.
Fil-każijiet tal-Ħamis irriżultaw pożittivi żewġ nisa tqal, li t-tnejn ma kellhomx sintomi. Dawn huma mara tqila ta’ tmienja u tletin sena li daħlet biex twelled, u Maltija ta’ tletin sena li kellha bżonn tidħol l-isptar għal appuntament u li ħarġet pożittiva f’test ta’ rutina.
Irriżultat pożittiv ukoll Maltija ta’ sebgħa u sittin sena li daħlet l-isptar għal operazzjoni bla ebda sintomi u sarilha test ta’ rutina.
Pożittiva għall-COVID-19 hemm ukoll carer ta’ wieħed u ħamsin sena li taħdem f’dar tal-anzjani u li wkoll ma kellha l-ebda sintomi. Fil-fatt, hija ħarġet pożittiva f’test li sarilha bħala parti mill-iscreening li qed isir fid-djar tal-anzjani.
Irriżulta fil-pożittiv ukoll Għawdxi li għandu diversi kundizzjonijiet kroniċi.
Hemm ukoll tifel, u tifla ta’ erba’ snin.
Kulma jmur, tul din l-imxija tal-Coronavirus qed ikun hemm persuni li għandhom il-virus imma li ma juru l-ebda sintomi.
Mistoqsija dwar dan mill-ġurnalista ta’ ONE News, il-Professur Charmaine Gauci qalet li dan huwa fenomenu li qed iħasseb lill-awtoritajiet tas-saħħa mhux biss ta’ pajjiżna imma anki ta’ pajjiżi oħra.
Il-Professur Gauci stqarret, “Nafu mill-evidenza sa issa li jkollok iktar tifrix tal-virus meta għandek is-sintomi speċjalment deni, għatis u sogħla però ċ-ċansijiet li jkollok xi ħadd pożittiv u xorta jgħaddiha, xorta qiegħed hemm u huwa għalhekk li daħħalna ċertu miżuri fil-bidu nett li nagħmlu dak il-physical distancing għax inti ma tafx dak il-persuna li qiegħed maġenbek jekk hux qed iġorr dan il-virus jew le.”
Fl-aħħar żviluppi dwar il-coronavirus f’pajjiżna, l-Isptar Mater Dei se jkun qed iwaqqaf il-viżti b’mod temporanju biex jiġu protetti l-pazjenti u l-ħaddiema li jaħdmu fl-isptar.
Il-Professur Gauci appellat biex fejn possibbli jsiru xirjiet online u jitwasslu d-dar.
Fejn dan mhux possibbli, importanti li jiġu evitati ħinijiet fejn ikun hemm ħafna nies is-supermarkets, u biex meta x-xirja tittieħed id-dar tintmesaħ bl-ilma u bis-sapun.
Fuq kollox saħqet li ikliet u ġabriet tal-familji f’Ħadd il-Għid, m’għandhomx isiru.
“Ejja ma ninġabrux għand xulxin għaliex dik hija riskju. Nifhem li ġejjin il-Ġimgħa l-Kbira u l-Għid però ingawduhom jekk il-Bambin irid sena oħra. Din is-sena ma nistgħux niltaqgħu għall-ikla ta’ nofsinhar. Ejja ngawduha ma’ xulxin jekk hemm mezzi ta’ komunikazzjoni, nużawhom, minn djar għall-oħra, però ejja nipproteġu lin-nies vulnerabbli tagħna għaliex jien hija dieqa kbira li niġi hawnhekk u jkolli nħabbar dawn l-imwiet.” Ikkonkludiet tgħid is-Supretendent għas-Saħħa Pubblika.
