Sa tmiem din il-ġimgħa, bejn il-21 u l-25 ta’ Ġunju, qed issir it-tielet edizzjoni tal-International Wine Festival, li għal darb’oħra qed tiġi organizzata fil-Ġnien tal-Argotti, il-Furjana.
‘Il fuq minn 13-il kumpanija tal-inbid, kemm dawk li jipproduċu hawn Malta u anke importaturi, qed jesebixxu u jdewqu l-madwar 300 tip differenti ta’ nbid tagħhom lil kull min iżur dan l-avveniment prestiġġjuż.
Kif spjega l-organizzatur tal-festival, Jonathan Pace, fl-Argotti f’dawn il-jiem se jkun hemm ukoll esperti tal-inbid, fosthom dawk mill-Istitut tal-Istudji Turistiċi, l-ITS.
“Se jkollna wkoll esperti internazzjonali, fosthom mill-Italja u anke Franza, li kull viżitatur li se jżur l-festival se jkollu l-opportunità li jtejjeb l-għarfien tiegħu permezz ta’ workshops, master classes, u anke logħob interattiv li se noħolqu.”
Jonathan Pace
Il-Ministru għat-Turiżmu, Clayton Bartolo, innota kif avvenimenti bħal dawn qed ikomplu jsaħħu l-qasam turistiku ta’ pajjiżna, billi jattiraw eluf ta’ nies, inkluż turisti, lejhom.
“Irridu naraw li t-turist li jiġi hawn Malta jduq ukoll l-aspett gastronomiku u anke jgawdi mill-kultura u l-identità tagħna l-Maltin. Dan l-avveniment huwa eżempju ċar ta’ kemm kapaċi jkollna prodott turistiku diversifikat illi jattira lil kulħadd, jiġifieri turisti u anke familji Maltin u Għawdxin, li se jgawdu minn dan l-avveniment.”
Ministru Clayton Bartolo
Preżenti għall-konferenza tal-aħbarjiet kien hemm ukoll iċ-Chairman tal-Awtorità tat-Turiżmu, Gavin Gulia, u s-sindku Dominic Grima f’isem Reġjun Port.
Id-dħul għall-Wine Festival huwa b’xejn u se jkun miftuħ bejn is-sitta ta’ filgħaxija u nofsillejl.
