30 sena ta’ mużika mill-aqwa.
30 sena sbieħ il-Ħadd filgħodu ta’ kumpanija mill-aqwa fuq l-istazzjon ta’ One Radio.
30 sena tal-programm ‘Bonġu Solid Gold.’
Dan kien is-sentiment ewlieni sbieħ il-Ħadd filgħodu f’edizzjoni oħra tal-programm ‘Bonġu Solid Gold’, li ilu għal dawn l-aħħar 30 sena iżomm kumpanija lis-semmiegħa ta’ ONE Radio, kull nhar ta’ Ħadd filgħodu.
Tkellimna mal-preżentatur Josef Caruana, li ilu jippreżenta dan il-programm mill-bidu tiegħu, fis-sena 1992. Fil-fatt il-programm huwa l-eqdem ‘Breakfast Show’.
Hu stqarr magħna kif minn meta beda l-programm għal issa, saru ħafna bidliet.
Hu rrakkonta kif il-kumpless ONE kien għadu biss ftit żrar.
Caruana stqarr, “Apparti li xjaħt jien ukoll mal-programm, imma mill-1992, l-istazzjon inbidel drastikament, il-Breakfast Show ukoll inbidel, ġifieri, Solid Gold, mill-mod umli kif beda, u sakemm żviluppa u mmatura anke forsi permezz tal-mużika u anke permezz tas-semmiegħa tagħna, bla dubju 30 sena, hija ħajja kważi ta’ bniedem.”
Huwa semma kif il-kumplimenti tas-semmiegħa jixhdu li l-formola tal-programm hi waħda ta’ suċċess, u b’hekk jittama li tibqa’ taħdem fis-snin li ġejjin sabiex il-programm ikompli jaddatta.
Hu rringrazzja wkoll lis-semmiegħa kif ta’ kull ġimgħa, għal 30 sena, dejjem żammew l-appuntament tagħhom għall-programm ‘Bonġu Solid Gold’.
Caruana qal, “Ir-rikonoxximent mhux biss, tiegħi, anke jekk forsi s-sagrifiċċju nagħmlu forsi l-akbar jiena, imma bla dubju is-sagrifiċċju tas-semmiegħa, dawk illi l-Ħadd filgħodu jqumu u jkunu magħna, jibagħtulna messaġġi, imma sempliċiment fil-qalb inkunu magħhom il-ħin kollu.”
