Għall-iskema ta’ double glazing f’Birżebbuġa qed igawdu mal- mitejn u sittin familja. Permezz ta’ din l-iskema, il-Gvern se jkun qed iħallas disgħin fil-mija (90%) ta’ massimu ta’ elfejn ewro (€2,000) meta wieħed ibiddel l-aperturi tiegħu.
Din l-iskema tiswa aktar min nofs miljun ewro u hija ffinanzjata mill-Port Ħieles.
Dan tħabbar mill-Ministru għall-Ekonomija Silvio Schembri flimkien mal-Ministru għall-Enerġija Miriam Dalli waqt konferenza tal-aħbarijiet f’din il-lokalità.
Il-Ministru Silvio Schembri qal kif huwa l-impenn tal-Gvern li jnaqqas l-inkonvenjent fuq ir-residenti ta’ Birżebbuġa minħabba x-xogħol li jkun għaddej fil-Port Ħieles, fosthom ħsejjes ta’ inġenji. Fost miżuri oħra li semma l-Ministru Schembri hemm dik li ngħata l-asfalt madwar il-Port Ħieles.
“Irridu nkomplu nimbuttaw ekonomija ta’ ġid għal kulħadd u meta ngħidu ekonomija ta’ ġid għal kulħadd, irridu naraw li waqt li l-attività ekonomika ħa ssir, ir-residenti wkoll igawdu. Hanwhekk għandna attività tal-Freeport li tiġġenera attività ekonomika, però huwa inkonvenjent għar-residenti u għalhekk ħriġna wkoll skema oħra ta’ double glazing, din id-darba allokajna iktar min-nofs miljun ewro, li kellek madwar 260 persuna li bbenefikaw minnha.”
Min-naħa tagħha, il-Ministru għall-Enerġija Miriam Dalli qalet kif din l-iskema mhux biss se tnaqqas l-inkonvenjent fuq ir-residenti iżda wkoll tissalvagwardja l-enerġija. Qalet kif dan il-proġett huwa parti mill-viżjoni tal-Gvern, li sal-2050 jkollna ekonomija mibnija fuq is-sostenibiltà.
“L-iskema tad-double glazing titkellem dwar il-ħtieġa li jkollna effiċjenza akbar fl-enerġija u għalhekk nilħqu l-miri tagħna f’dan il-qasam. Però bħala Gvern qegħdin naħdmu fuq pjan li joħodna l-pjan fit-tul. Il-viżjoni tagħna hija li nnaqsu t-tniġġis minn sorsi ta’ enerġija, li nżommu l-orħos kontijiet tad-dawl, li naraw li jkollna sigurtà tas-supply tal-enerġija, li niddiversifikaw is-sorsi u li żżommu l-konsumaturi fil-qalba tal-pjan tagħna.”
Waqt l-istess konferenza tal-aħbarijiet, il-Ministru Silvio Schembri ħabbar kif se jkun qed jibda x-xogħol fuq parkeġġ li se jesa’ 400 parkeġġ ġdid f’Birżebbuġa, b’investiment ta’ €3 miljun.
