Jum bogħod minn okkażjoni ferm prestiġġjuża taż-żjara tal-Papa Franġisku fil-gżejjer Maltin, il-Fosos fil-Floriana, il-Palazz tal-President u s-Santwarju ta’ Pinu ġewwa Għawdex qed jiġu mżejna b’ammont kbir ta’ fjuri u arbuxellli.
B’kollox 240 metru ta’ pjanti se jkunu qed jagħtu dehra isbaħ lil dawn il-postijiet li l-Papa se jżur jew se jagħmel ċelebrazzjonijiet liturġiċi fihom. Dawn il-postijiet se jkunu qed jingħataw bixra differenti minn tnax-il sena ilu hekk kif minflok fjuri kkuluriti se jintużaw l-ilwien aħdar u vjola b’rabta maż-żmien tar-Randan.
Siġar taż-żebbuġ u ħmistax-il kilo qamħ ingħataw prijorità f’dan it-tiżjin hekk kif huma mkabbra lokalment u tipiċi Meditteranji.
ONE News mar fuq il-Fosos biex jara l-arranġamenti li qed isiru madwar it-tribuna tal-Papa. Alistair Fenech, li qed imexxi dan il-proġett, spjegalna l-idea tat-tluq tiegħu biex jagħti bixra interessanti u jikkumplimenta d-disinn tal-palk bl-ilwien oranġjo u vjola.
Qal, “Il-punt tat-tluq kien il-Bibbja ġifieri aħna rajna dawk il-pjanti u s-siġar li huma msemmijin fil-bibbja, rajna dak li hu available, dak li hu seasonal bħalissa, jiġifieri kemm jista’ jkun ippruvajna nużaw materjal li huwa tal-istaġun imbagħad minħabba li kien hemm limitations ta’ dak li huwa available kellna nduru fuq materjal ieħor kemm li huwa Malti, kemm prodott imkabbar Malta, kemm prodott li huwa Mediterranju jiġifieri jidħol tajjeb mal-pajjiż tagħna kif ukoll daħħalna ftit fjuri biex ikun hemm element żgħir ta’ kulur li jaqbel kemm mat-tribuna kif ukoll anke l-kulur kumplimentari għal mal-vjola li huwa l-orange u l-peach biex b’hekk anka nikkuntrastaw ftit u noħolqu anke design li tkun iktar daqsxejn interessanti.”
Ma’ Alistair Fenech tkellimna wkoll dwar iż-żjara tal-Papa Benedittu Sittax, ta’ tnax-il sena ilu fejn spjegalna li tikkuntrasta immens ma’ tal-Ħadd li ġej hekk kif l-palk kien kulur l-ikħal, bi fjuri sofor. Il-ħarsa naturali tal-arranġament ta’ nhar il-Ħadd taqbel mas-sempliċità tal-Papa Franġisku u titbiegħed minn kull forma ta’ superjorità.
Qal, “Bħala kunċett u idea hija kompletament differenti jiġifieri iż-żmien tas-sena wkoll huwa differenti jiġifieri dakinhar kienet il-ġimgħa ta’ wara l-Għid il-Kbir jiġifieri fejn għandek ċelebrazzjoni għaliex żmien l-Għid huwa żmien ta’ ċelebrazzjoni u din id-darba huwa żmien ir-Randan allura żmien differenti u għal daqshekk id-disinn qed jirrifletti dak iż-żmien tas-sena li ninsabu fih u anka l-lituriġija, iż-żmien li huwa propju adattat għal dan iż-żmien.”
Fenech spjega kif dan huwa ta’ sodsfazzjon li kellu l-opportunità jiddisinja pjanti, siġar u fjuri għal dawn iċ-ċelebrazzjonijiet. Huwa spjega kif it-tim tiegħu kien preparat għal kull eventwalità hekk kif l-kobor tal-post jirrikjedi xogħol u dedikazzjoni kbira.
Qal, “Hemm sodisfazzjon kbir jiġifieri dawn huwa proġett li inti tkun qed taħdem fuqu ħin twil kuljum. Jiġifieri dan huwa proġett li inti ma tista’ tħalli xejn li jaħrablek jiġifieri int trid tipprepara għall-elementi, trid tipprepara għal kull eventwalità, trid tkun preparat bit-truppa tajba miegħek u b’sapport kbir mit-tim tiegħi però trid tkun preparat, trid tkun preparat ħafna imma jekk Alla jrid ir-riżultati nittama li jkunu riżultati sbieħ u bħal ma konna tnax-il sena ilu kienu riżultati sbieħ ħafna hekk ukoll din id-darba.”
