Fl-ewwel sitt xhur ta’ din is-sena, l-Awtorità għas-Saħħa u s-Sigurtà fuq il-Post tax-Xogħol, l-OHSA, wettqet elfejn mija sebgħa u sebgħin spezzjoni f’postijiet differenti tax-xogħol.
Dan l-istazzjon segwa numru minn dawn l-ispezzjonijiet f’siti ta’ kostruzzjoni, flimkien ma’ tim mill-OHSA.
Huma spjegawlna li, f’dan il-qasam partikolari, l-akbar biża’ jkun ta’ waqgħat mill-għoli, li kultant ikunu jistgħu jiġu evitati kieku ma jkunx għal deċiżjoni li tkun ittieħdet b’ħeffa waqt il-ħin tax-xogħol.
Għalkemm ċerti setturi, bħal dawk tal-kostruzzjoni u l-manifattura, jitqiesu bħala aktar perikolużi, l-Awtorità taħdem ma’ kull settur tal-ekonomija.
Fil-fatt, l-Awtorità għandha regolamenti speċjali għal gruppi vulnerabbli fis-soċjetà bħan-nisa tqal, l-anzjani, u ż-żgħażagħ li jkunu preżenti f’postijiet tax-xogħol.
Dwar dan kollu tkellimna mal-Kap Eżekuttiv tal-Awtorità għas-Saħħa u s-Sigurtà fuq il-Post tax-Xogħol, Dr Mark Gauci.
Huwa qal li l-infurzar jibqa’ parti importanti ħafna fil-ħidma tal-OHSA. Fil-fatt, matul l-ewwel sitt xhur ta’ din is-sena, l-ispezzjonijiet wasslu biex ngħataw ftit aktar minn mitt elf ewro f’multi lil impriżi li jinqabdu jiksru xi regolament jew ieħor.
Il-ħruġ tal-multi jappartjenu għall-aspett tal-infurzar. Sfortunatament, f’każijiet ripetittivi ta’ nuqqasijiet, l-Awtorità tipproċedi għall-proċeduri fil-Qrati, skont kif stipulat mil-liġi.
Minkejja lli -aħbarijiet dwar l-inċidenti li jseħħu fuq il-lant tax-xogħol iqajmu diskussjoni dwar is-saħħa u s-sigurtà tal-ħaddiema, il-Kap Eżekuttiv tal-Awtortià qasam magħna statistika uffiċjali li turi kif r-rati tal-inċidenti u l-fatalitajiet fuq il-postijiet tax-xogħol ilha sa mill-2002 tonqos b’mod konsiderevoli.
Dan jista’ jiġi attribwit għal diversi fatturi li fuqhom taħdem l-istess Awtorità iżda wkoll għall-interess ta’ min iħaddem li llum huwa aktar mgħarraf dwar il-bosta benefiċċji li jgawdi minnu l-post tax-xogħol jekk ikun ħieles kemm jista’ jkun mill-perikli.
L-ispezzjonijiet, jagħmlu biss parti mill-ħidma li twettaq din l-Awtorità, li tmur lil hinn mill-infurzar tar-regolamenti li jaqgħu taħt il-ħarsien tagħha.
“Però, il-ħidma ma tiqafx hawn lanqas. L-OHSA tara li jkun hawn ħafna għarfien, tipprova tqajjem kuxjenza dwar il-benefiċċji tas-saħħa u s-sigurtà, imma wkoll tgħin lil kull min għandu xi obbligu u tiffaċilitalu l-proċess biex ikun jista’ jimxi mal-liġi. Għal dan il-għan l-OHSA tippubblika ħafna linji gwida, kodiċi ta’ prattika, biex jgħinu lil dak li jkun josserva l-liġijiet.”
Bħala Awtorità li taħdem ta’ kuljum fil-qasam, hija tgħin wkoll fit-tfassil ta’ leġiżlazzjoni ġdida.
“Ħadmet ħafna biex ikollna qafas leġiżlattiv żviluppat li jirrifletti l-ħtiġijiet tad-dinja tal-lum. Id-dinja tax-xogħol kontinwament qed tevolvi u l-OHSA tara li l-iżvilupp fil-qafas leġiżlattiv ikun qed jirrifletti wkoll dawn it-tibdiliet fid-dinja tax-xogħol.”
Wara li, sfortunatament, iseħħ inċident, l-OHSA hija obbligata li tinvestiga. Hawnhekk, il-prijorità tkun li tara jekk ikunx hemm negliġenza fuq il-post tax-xogħol sabiex l-inċidenti ma jirrepetux ruħhom.
