San Ġwanni Pawlu II, imwieled Karol Józef Wojtyła fit-18 ta’ Mejju 1920, f’Wadowice, il-Polonja, serva bħala l-Papa u mexxej tal-Knisja Kattolika mill-1978 sa mewtu fit-2 ta’ April 2005 fl-età ta’ 84 sena.
Kien l-ewwel Papa mhux Taljan f’455 sena u kien ġej minn pajjiż Slav. Il-pontifikat tiegħu, li dam aktar minn 26 sena, kien it-tielet l-itwal fl-istorja.
Ġwanni Pawlu II kien magħruf għall-vjaġġi estensivi tiegħu, li kienu jippromwovu l-ftehim bejn in-nazzjonijiet u r-reliġjonijiet, u jindirizza l-oppressjoni politika u l-materjaliżmu tal-Punent. Huwa ħareġ apoloġija bla preċedent lil gruppi storikament inġurjati mill-Kattoliċi, inklużi Lhud u Musulmani.
In-nazzjonaliżmu Pollakk u d-difiża tiegħu għall-attiviżmu mhux vjolenti appoġġjaw il-moviment Solidarjetà fil-Polonja, u kkontribwixxew għax-xoljiment paċifiku tal-Unjoni Sovjetika fl-1991. Globalment, huwa kien favur id-dinjità umana u oppona l-vjolenza. Minkejja l-influwenza tiegħu, l-istil ta’ governanza ċentralizzata li kien iħaddan kienet meqjusa bħala awtokratika minn xi membri tal-kleru, u tħabat mhux ftit biex żied in-numri fil-vokazzjonijiet tal-qassisin u s-sorijiet.
Il-fehmiet tradizzjonali tiegħu dwar il-moralità personali u sesswali aljenaw ukoll lil xi lajċi.
F’Mejju 2005 is-suċċessur tiegħu, il-Papa Benedittu XVI, irrinunzja għall-perjodu solitu ta’ stennija ta’ ħames snin, u ħalla li tibda reviżjoni fil-kawża ta’ Ġwanni Pawlu II għall-beatifikazzjoni u l-kanonizzazzjoni.
F’Jannar 2011, il-Vatikan irrikonoxxa l-fejqan ta’ soru Franċiża mill-marda tal-Parkinson bħala miraklu li għamel Ġwanni Pawlu II.
Huwa ġie beatifikat fl-1 ta’ Mejju u kkanonizzat mal-Papa Ġwanni XXIII fis-27 ta’ April 2014, bil-festa tiegħu tiġi ċċelebrata nhar it-22 ta’ Ottubru.
