Daħlet fis-36 siegħa l-operazzjoni mill-Protezzjoni Ċivili fiż-żona ta’ Sant Marija Estate fil-Mellieħa. Operazzjoni li bdiet għall-ħabta tal-10:00 tat-Tnejn filgħodu wara li xufier ta’ vann li jqassam il-gass fiż-żona rrapporta li kien hemm ħruġ ta’ gass mit-tank li kellu fih madwar 11,000 litru ta’ gass.
Jidher li kollox beda meta żviluppaw xi ħsarat fil-valv ewlieni tat-tanker tal-gass tal-Kumpanija Liquigas li ta’ sikwit imur iqasam il-gass fiż-żona.
Minnufih isejħu l-membri tal-Protezzjoni Ċivili fi Triq Għajn Żejtuna u Triq il-Qasab minħabba l-periklu li żviluppa.
L-operazzjoni bdiet immedjatament u baqgħet għaddejja matul il-lejl bil-għan li tiġi evitata splużjoni. L-operazzjoni mistennija tkompli fis-sigħat li ġejjin sa tard it-Tlieta bil-lejl sbiħ l-Erbgħa.
S’issa ħadu sehem mal-għoxrin pumpier u ntużaw ħames vetturi tat-tifi tan-nar flimkien ma’ disgħin elf litru ta’ ilma.
Kevin Pace, Chief Assistant Rescue Officer tal-Protezzjoni Ċivli spjega kif qed jinħareġ il-gass mit-tanker u qed jinħaraq bin-nar fi fjamma sabiex jinqered.
“Il-gass qed ngħinuh jitfraforma f’vapours, il-vapours qed jitilgħu ’l fuq, joħorġu minn sistema apposta, għandna fjamma li qed taqbad bħal meta qed tqabbad burner sabiex il-gas li ħiereġ jinħaraq”.
Il-gass qed jinħaraq bil-mod ħafna u filfatt fl-ewwel 24 siegħa inħaraq biss 15% tal-gass. Madankollu l-proċess beda jieħu xejra oħra fi-sigħat tat-Tlieta filgħodu:
“Dalgħodu meta kien għad kellna ammont ta’ gass fih ma kellniex bżonn ix-xita, iżda mbagħad kellna bżonn ix-xita għaliex iktar ma beda jonqos il-gass iżjed it-temperatura ġo fih bdiet tiksah u beda jrabbilna l-condensation ġo fih. Iżda mbagħad kieku ħarġet iżjed xemx kienet tgħina iżjed għaliex aħna għandna bżonn li nsaħħnu t-temperatura ħalli l-gass jkun jista jintilef iżjed u jinħaraq iżjed malajr”.
Is-Sur Pace spjega kif il-proċess qed jiġi ssorveljat b’mod kontinwu anke t-tanker minn ġewwa:
“Inżommuh contained u bil-gas detectors nċiċekjawh u anke bit-terminal image camera, u nħarsu ġo fih u naraw li l-proċess miexi b’ritmu tajjeb”.
F’din l-operazzjoni kellhom jiġu evakwati tlett idjar fil-viċinanzi u filfatt tul l-operazzjoni qed il-ħin kollu jixxarbu s-siġar tal-madwar biex jitnaqqas il-periklu li xi nirien jinfirxu:
“Ma jidħol ħadt fiż-żona għax għandek ir-riċetti kollha biex tiġi kkawżata splużjoni. L-inqas ħaġa li rridu hija s-source of ignition , fiflatt għandna s-sistema tal-elettriku maqtugħa kolla u qed naħdmu f’ambjent sigur”.
Din huwa t-tieni każ simili din is-sena, hekk kif f’Marzu li għadda l-Membri tal-Protezzjoni Ċivili ħarġu 11-il tunellata ta’ gass LPG minn tanker f’Ħal Luqa. Madankollu dakinhar l-operazzjoni ħadet biss ħames sigħat.
Fl-operazzjoni li għaddejja tal-Mellieħa qed jieħdu sehem Uffiċjali mill-Korp tal-Pulizija, ħaddiema ta’ Liquigas, Gasco flimkien ma’ kumpaniji privati.
