- Xogħlijiet estensivi f’toroq oħra fejn tista’ tgħid saru mill-ġdid
- Mizzi: “Gvern preċedenti ħalla din il-problema tikber”
F’erba’ snin t’amministrazzjoni f’pajjiżna saru aktar minn 160 triq ġdida, medja ta’ 40 triq kull sena. Xogħol li ġeneralment jidher u xi drabi le, però li għamel differenza kbira għal uħud.
Fl-istess waqt li saru t-toroq ġodda, il-poplu kompla jgawdi minn għadd ta’ miżuri favur il-familja, drittijiet ġodda u iżjed flus fil-but.
Fil-Parlament, il-Ministru għat-Trasport u l-Infrastruttura Joe Mizzi ta rendikont tax-xogħlijiet li saru fit-toroq f’kull distrett ta’ Malta u Għawdex tul l-erba’ snin ta’ din l-amministrazzjoni, bis-sena 2013 tkun l-aktar waħda li tulha saru toroq ġodda.
Fil-fatt, fl-ewwel sena ta’ din l-amministrazzjoni saru 62 triq ġdida segwita mis-2016 li fiha saru 45 triq ġdida filwaqt li fl-2014 u l-2015 saru 31 u 25 triq ġdida rispettivament.
Dawn f’żoni residenzjali, arterjali u distributorji li saru minn Trasport Malta li hija responsabbli minn bini u manutenzjoni tat-toroq.
Għal-lokalitajiet ta’ Birżebbuġa, Ħal Kirkop, Marsaxlokk, Qrendi, Ħal Safi u ż-Żurrieq erba’ snin t’amministrazzjoni Laburista fissru 31 triq ġdida.
Fl-istess waqt li saru toroq ġodda, f’toroq oħra sar xogħol ta’ pavimentar, ingħatalhom wiċċ ġdid jew sarilhom xogħol maġġuri u oħrajn kellhom jinbnew mill-ġdid minħabba l-istat ħażin li kienu fih.
Fil-fatt f’erba’ snin ta’ din l-amministrazzjoni kien hemm 18-il triq li kellha tinbena mill-ġdid. 12 minnhom saru fl-2016.
Minbarra hekk, kien hemm żona sħiħa li kellha tkun irriġenerata. Iż-żona tal-Baċir Numru 1 f’Bormla sarula xogħlijiet fi Triq l-Inkurunazzjoni, Triq l-Immakulata, Pjazza Gavinu Gulia, Triq San Pawl, Triq Fuq San Pawl u Triq ix-Xatt. Dan kollu sar fis-sena 2014.
Anke jekk toroq residenzjali huma l-aktar iffrekwentati, il-Gvern ma nesiex żoni u toroq rurali.
Fl-2015 saru 71 triq rurali mifruxa mat-12-il distrett f’Malta u Għawdex. Kien hemm għadd ta’ toroq oħra li sarilhom xogħlijiet t’asfalt u ta’ konkrit.
Kien taħt din l-amministrazzjoni li tlestiet Triq il-Kosta b’investiment ta’ 53 miljun ewro u bħalissa għaddej xogħol fil-junction tal-Kappara. Xogħol li issa daħal fit-tielet fażi. Biex imbagħad wara l-junction tal-Kappara ħidmet Trasport Malta u tal-Gvern se tkun fuq il-Marsa. Dan wara li l-Unjoni Ewropea allokat 39 miljun ewro biex din iż-żona tant iffrekwentata f’pajjiżna tinbidel kompletament b’tali mod li tnaqqas l-inkonvenjenti.
F’kummenti mal-gazzetta Kullħadd il-Ministru Joe Mizzi qal li Trasport Malta tagħti l-għajnuna tagħha fejn it-toroq ma jsirux mill-Kunsilli Lokali però huwa importanti li wieħed jassumi r-responsabbiltajiet tiegħu.
“Huwa minnu li għad hawn il-problemi li qed jikkawżaw inkonvenjenzi, però kulħadd jara l-parti fejn tolqot lilu bid-differenza li l-Gvern għandu baġit għall-pajjiż kollu. Sfortunatament gvern preċedenti ħalla din il-problema tikber u dak li ma sarx f’25 sena beda jsir minn din l-amministrazzjoni” qal il-Ministru Mizzi.
Joe Mizzi rrimarka li dan il-Gvern qed ikun iżjed viġilanti biex itejjeb il-kwalità ta’ xogħlijiet li jagħmlu l-kuntratturi u jara li jkun hemm iktar koordinazzjoni bejn l-EneMalta, il-korporazzjoni għas-Servizzi tal-Ilma u Transport Malta.
“Wieħed irid jifhem li proġetti kapitali jirrikjedu ammont kbir ta’ investiment, però għalkemm mirakli ma jsirux, dan il-Gvern telaq bi pjan biex jindirizza din il-problema,” temm jgħid il-Ministru Mizzi.
