Tul l-aħħar 24 siegħa feġġew 13-il każ ta’ COVID-19 f’pajjiżna minn fost 1,022 test. Dan ifisser li issa Malta għandha total ta’ 412-il każ ta’ Coronavirus li ħarġu minn 21,164 test li sar. Is-Supretendent tas-Saħħa Pubblika l-Professur Charmaine Gauci qalet ukoll li 38 persuna oħra fiequ minn din il-marda biex issa għandna total ta’ 82 persuna mfejqa. Fl-istess ħin żewġ pazjenti għadhom qed jinżammu fit-Taqsima tal-Kura Intensiva tal-Isptar Mater Dei, b’wieħed minnhom għadu fuq il-ventilatur.
Erba’ mill-każijiet ikkonfermati llum huma immigranti miċ-Ċentru l-Miftuħ ta’ Ħal Far li bħalissa jinsab kollu kemm hu taħt kwarantina. Hawnhekk is-Supretendent tas-Saħħa Pubblika qalet li minħabba li għadhom qed ifeġġu każijiet ġodda mir-resdienti taċ-ċentru l-perjodu ta’ kwarantina se jiġi estiż.
Il-Professur Gauci qalet, “Bħal ma kontu qed taraw komplejna kemm naraw jekk hemmx nies bis-sintomi f’dan il-post u anke testijiet kuljum fuq il-persuni. L-għan hu li nikkontrollaw is-sitwazzjoni biex jekk ikun hemm każijiet pożittivi tiżolahom.”
Anzjana ta’ 96 sena li kienet daħlet l-isptar għal raġunijiet oħra wkoll ittestjat fil-pożittiv. Il-Professur Gauci qalet li din għadha qed tinżamm l-isptar Mater Dei u tinsab f’qagħda stabbli.
Maltija ta’ 46 sena li rriżultat fil-pożittiv fl-aħħar 24 siegħa hija sid ta’ ħanut. Il-Professur Gauci qalet li l-mara għalqet il-ħanut iżda kienet qed twassal ix-xirjiet lill-klijenti. L-Awtoritajiet tas-Saħħa qed jieħdu informazzjoni mill-pazjenta dwar liema klijenti qdiet f’dan iż-żmien biex dawn jinżammu fi kwarantina u jiġu ttestjati jekk jiżviluppaw xi sintomi.
Malti ta’ 44 sena li rriżulta fil-pożittiv jidher li kien għadu qed imur għax-xogħol, u filfatt żewġ persuni li kellhom kuntatt miegħu fuq il-post tax-xogħol, u żewġt iqraba tiegħu, ilkoll qed jinżammu fi kwarantina.
Raġel min-New Guinea li jgħix Malta irriżulta fil-pożittiv ukoll. Dan ħadem l-aħħar fil-15 ta’ April, u l-awtoritajiet tas-saħħa għaddejjin bl-intraċċar tal-kollegi tiegħu u l-persuni li jgħix magħhom.
Ħaddiema ta’ San Vinċenz ta’ 22 sena wkoll irriżultat fil-pożittiv. Din kella kuntatt ma’ pazjenta oħra li rriżultat fil-pożittiv din il-ġimgħa u għalhekk kienet qed tinżamm fi kwarantina.
“Importanti li meta nkunu f’postijiet tax-xogħol innaqsu l-ammont ta’ affarijiet li għandna fuq id-desk biex kemm jista’ jkun ikollok il-psot fejn taħdem nadif.” Stqarret is-Supretendent għas-Saħħa.
Irriżulta fil-pożittiv ukoll Ingliż ta’ 58 sena li jgħix Malta li ddaħħal l-isptar għal raġunijiet oħra. Dan irriżulta fil-pożittiv wara li sarlu test ta’ rutina u bħalissa qed jinżamm iżolat.
Raġel mis-Sri Lanka ta’ 28 sena li kien f’kuntatt ma każ ieħor u jinsab fi kwarantina, Maltija ta’ 59 sena li kellha kuntatt ma’ qarib wieħed biss u Malti ta’ 60 sena li ma kienx qed jaħdem lkoll irriżultaw fil-pożittiv.
“Dejjem nagħmel l-appell tiegħi biex nikkontrollaw is-sitwazzjoni u nieħdu ħsieb saħħitna u l-anzjani u persuni b’mard kroniku. Ejja ngħinuhom biex ikunu jistgħu jibqgħu d-dar ħlief għall-vera bżonnijiet tagħhom.” Temmet tgħid il-Professur.
