Fl-aħħar 24 siegħa feġġew 13-il każ ġdid ta’ Coronavirus f’pajjiżna.
Ikkonfermat dan is-Supretendent tas-Saħħa Pubblika l-Professur Charmaine Gauci, f’konferenza oħra tal-aħbarijiet bl-aħħar aġġornamenti dwar l-imxija tal-Covid-19 f’pajjiżna.
Il-Professur Gauzi spjegati kif it-13-il każ ħarġu minn 563 eżami ta’ swabbing, biex b’hekk sa’ llum il-ġurnata f’Malta hawn 169 każ konfermat ta’ Coronavirus.
8 minn dawn il-każijiet huma ta’ trażmissjoni lokali u 5 każi huma relatati ma’ safar.
Il-kundizzjoni medika ta’ dawn it-13 il-każ huma kollha tajbin.
Il-Professur Gauci spjegat ukoll kif żewġ pazjenti għadhom jinsabu fit-Taqsima tal-Kura intensiva (ITU) bir-raġel li kienu f’kundizzjoni kritika jibqa’ intubat, 7 persuni jinsabu fit-taqsima tal-mard infettiv u 16-il persuna huma rikoverati fl-Isptar St. Thomas. Il-kumplament tal-persuni bil-Coronavirus jinsabu rikoverati f’darhom.
Ħames każijiet ġodda huma kollha relatati ma’ każ ieħor li ġie nnotifikat iktar kmieni. Dan kien każ ta’ persuna li mar għax-xogħol meta kellu bidu tas-sintomi u minn testijiet u contact tracing li sar hemmhekk irriżulta li 3 persuni kellhom riżultat pożittiv.
Żewġ persuni relatati ma’ dawn il-persuni li ttestjaw fil-pożittiv ukoll ittieħdu mill-imxija biex b’hekk hemm cluster ta’ 6 minn nies. Il-Professur Gauci spjegat kif din tissejjaħ 2nd generation transmission.
Dawn il-każijiet jinvolvu mara Maltija ta’ 30 sena li bdiet bis-sintomi fil-25 ta’ Marzu, mara Maltija ta’ 26 sena bdiet bis-sintomi fis-20 ta’ Marzu, mara oħra ta’ 43 sena li bdiet bis-sintomi fil-25 ta’ Marzu, raġel ta’ 41 sena u mara oħra ta’ 27 sena.
Każ ieħor huwa tal-ġenituri ta’ persuna oħra li kienet ikkonfermata bil-Coronavirus. Dawn huma mara ta’ 72 sena u raġel ta’ 75 sena.
L-aħħar każ ta’ trażmissjoni lokali hija tifla Maltija ta’ 8 snin li din ukoll hija t-tifla ta’ persuna li kellha l-Coronavirus. Hija bdiet bis-sinotmi fis-17 ta’ Marzu.
Il-każijiet relatati ma’ safar huma ta’ żewġ aħwa subien ta’ 18-il sena u 21 sena li jgħixu l-Ingilterra u li ġew Malta fit-18 ta’ Marzu. Huma bdew bis-sintomi fid-19 ta’ Marzu u l-25 ta’ Marzu rispettivament. Dawn il-persuni żammew mal-obbligu tal-kwarantina biex b’hekk ma affettwawx nies oħrajn. Il-Professur Gauci spjegat ukoll li qed issir contact tracing ta’ nies li kienu fuq l-ajruplan ma’ dawn iż-żewġ persuni.
Żewġ każijiet oħra relatati ma’ safar fl-Ingilterra huma ta’ żewġ irġiel ta’ 24 sena u 21 sena rispettivament li kienu relatati ma’ każ ieħor ta’ Coronavirus fil-passat. Hawnekk ukoll qed issir il-contact tracing fuq it-titjira li kienu fiha.
L-aħħar każ relatat ma’ safar huwa ta’ mara ta’ 48 sena li marret il-Marokk fuq btala, ġiet lura fid-19 ta’ Marzu u bdiet bis-sintomi fl-20 ta’ Marzu. Il-Professur Gauci spjegat kif fil-passat ġiet konfermata persuna oħra bl-imxija tal-Covid-19 u li kienet fuq l-istess btala ma’ din il-mara. Il-Professur Gauci spjegat li qed issir komunikazzjoni ma’ persuni li kienu fuq l-istess tour ma’ dawn il-persuni sabiex jiġu ċċekjati.
