Fl-aħħar disa’ snin is-Servizz Pubbliku implimenta 1,250 miżura maħsubin biex tonqos il-burokrazija. Minn dawn, is-sena l-oħra twettqu 186 miżura, li jfisser xejn inqas minn 83 fil-mija tal-miżuri li kienu maħsubin għal dik is-sena.
Dan tħabbar waqt konferenza tal-aħbarijiet indirizzata mis-Segretarju Permanenti Ewlieni, Mario Cutajar, meta ta bidu għall-Ġimgħa għas-Servizz Pubbliku li matulha se titnieda l-istrateġija għall-ħames snin li ġejjin.
Fil-fatt, matul din il-ġimgħa, se jitħabbru 45 miżura ġdida.
Is-Sur Cutajar qal li issa, minn strateġija ffokata fuq it-tiġdid, is-Servizz Pubbliku se jgħaddi għal strateġija li ssaħħaħ is-servizz.
Qal li, fl-aħħar snin, ħidmet is-Servizz Pubbliku kienet iffokata fuq li tonqos il-burkokrazija filwaqt li l-klijent jibqa’ dejjem fiċ-ċentru tal-ħidma. Għalhekk, issa jmiss servizz ta’ eċċellenza mibni fuq tliet pilastri: il-kwalità, is-servizz innifsu, u l-kontabilità.
Fl-istess konferenza tnediet ukoll it-tielet edizzjoni tal-pubblikazzjoni ‘Ħidma tas-Servizz Pubbliku’, li fiha hemm rendikont tal-ħidma li saret fl-aħħar tnax-il xahar.
Fost it-tagħrif li toffri din il-pubblikazzjoni, hemm li s-sena li għaddiet ġie ssimplifikat is-servizz tal-ECG, li jaffettwa mal-150 pazjent kuljum. Barra minn hekk, infetħu numru ta’ bereġ f’diversi lokalitajiet, filwaqt li t-tiġdid tal-liċenzji tas-sewqan beda jingħata online.
B’kollox hemm mal-1,500 servizz li qed jingħataw online u li huma aċċessibbli 24 siegħa kuljum. Uħud mis-servizzi, fosthom dawk tas-saħħa, qed jingħataw ukoll fil-komunitajiet.
Qal, “Illum il-ġurnata għandna servizz pubbliku li tista’ taċċessah minn kullimkien. Niġu l-ewwel fl-Ewropa fejn jidħol l-e-government, jiġifieri s-servizzi tal-Gvern online. Tista’ ssib is-servizz maġenbek, allura biddilna anke l-kunċett ta’ kif jingħata s-Servizz Pubbliku. Allura din hija bażi b’saħħitha biex għada pitgħada, fit-tmiem tal-ħames snin ,nuru li vera we meant business meta għidna ‘servizz ta’ eċċellenza’.”
Fl-istess publikazzjoni hemm rendikont li jispjega kif, is-sena li għaddiet, is-Servizz Pubbliku implimenta 90 fil-mija tar-rakkomandazzjonijiet tal-Uffiċċju Nazzjonali tal-Verifika u 98 fil-mija tal-każijiet magħluqa mill-Ombudsman juru li s-Servizz Pubbliku aġixxa b’mod korrett.
Is-Sur Cutajar tkellem dwar kif, fl-aħħar ħames snin, ġew investiti 250 miljun ewro biex jingħataw servizzi teknoloġiċi. Dan filwaqt li kompla sar l-investiment fin-nies.
