Grupp ta’ 102 immigranti fosthom tnejn mejta ddaħħlu Malta wara li kienu qed jegħrqu ftit ‘il barra mill-kosta fin-Nofsinhar ta’ Malta.
Kmieni dalgħodu, iċ-Ċentru għall-Koordinazzjoni ta’ Salvataġġ f’Malta rċieva informazzjoni li kien hemm dgħajsa f’diffikultà madwar 68 mil nawtiku ‘l barra min-Nofsinhar ta’ Malta. Dgħajsa tas-salvataġġ mill-Forzi Armati ta’ Malta salvat il-100 persuna abbord fosthom żewġ persuni mejta.
Fi tweet, il-Prim Ministru Joseph Muscat qal li Malta qed iżżomm mal-obbligi internazzjonali tagħha.
#Malta 🇲🇹 adheres to its international obligations. @Armed_Forces_MT rescues 100 persons and bring in 2 lifeless corpses this morning -JM pic.twitter.com/KbWjicv50h
— Joseph Muscat (@JosephMuscat_JM) August 22, 2018
Iktar kmieni llum, il-Gvern wieġeb għal akkużi li għamel il-Ministeru għall-Intern Taljan Matteo Salvini fejn sostna li Malta naqset milli tonora l-impenji tagħha f’mekkaniżmu stabbilit mill-awtoritajiet Taljani dwar mekkaniżmu ta’ tqassim ta’ immigranti.
Għall-kuntrarju ta’ dak allegat, l-awtoritajiet Maltin diġà kienu f’kuntatt mal-awtoritajiet Taljani biex mill-aktar fis jonoraw l-impenji tagħhom. Madankollu, qal li l-awtoritajiet Taljani ma pprovdew l-ebda proċedura tanġibbli biex Malta timxi magħhom.
Min-naħa l-oħra, il-Gvern qal li l-Italja ma ssodisfatx l-obbligi tagħha fil-mekkaniżmu ta’ tqassim li bdiet Malta rigward l-immigranti li abbord l-MV Lifeline fis-27 ta’ Ġunju li għadda. Dan minkejja l-isforzi tal-awtoritajiet Maltin irsistew biex jitkompla l-proċess mal-awtoritajiet Taljani.
Il-Gvern saħaq li Malta dejjem ipparteċipat f’mekkaniżmi ta’ solidarjetà u kienet l-ewwel stat membru Ewrpew li onora b’mod sħiħ l-impenji tiegħu dwar il-mekkaniżmu ta’ solidarjetà li l-Kummissjoni Ewropea nediet dwar l-immigranti li kienu qed jidħlu fl-Italja u l-Greċja.
Saħaq li Malta mxiet dejjem mal-liġijiet internazzjonali u mal-konvenzjonijiet applikabbli.
